Ruling VC/LC sum dawn a tam phah lo - Congress

Mizoram Pradesh Congress Committee (MPCC) Media depart­ment chuan, mipui himna aia party hamṭhatna dah hmasaah MNF party puhin, village council leh local council inthlan turah MNF candidate-te vote lo ngam turin mipui an chah a, "Ruling VC/LC nih avangin pawisa a dawn tam ngawt theih loh," an ti.

MPCC Media hian nimin khan Aizawl Press Club-ah thuthar thehdarhtute an kâwm a; an chairman Dr Lallianchhunga chuan, "VC leh LC inthlan awm turah rorelna chelh mektu MNF party-in an party candidate-te thlan tlinna khua leh veng tan chauh hmasawnna leh hamṭhatna awm thei tur angin thu belhchian dâwl lo an sawi. Minister pakhat phei chuan opposition VC chu 'Chawhmeh híng ang' tiin mipui thlan chhuahte a tehkhin a ni," a ti a; minister pakhat thil sawi dan chu mipui hmuhsitna tàwpkhâwka an ngaih thu a sawi.

Dr Lallianchhunga chuan, Congress rorel lai aṭang tawhin VC-a ruling leh opposition-te'n State Finance Commission rawtna angin an chanpual tur an chang vek tih sawiin, "Ruling VC nih vangin sorkar aṭangin ṭanpuina an dawng tam ngawt bik lo a, opposition VC-te pawhin an chanpual an chang vek. Nikum lawka VC-te'n Excluded Area Fund an dawn pawh Congress sorkar hun lai 

aṭanga LAD-in popula­tion leh area mila a tihfel sa vek anga sem a ni," a ti.

15th Finance Commission rawtna anga Finance depart­ment-in July 13, 2020-a VC-te tana cheng nuai 9,300 a sem turah pawh ruling leh eptu bial thliar theih a nih loh thu sawiin Lallianchhunga chuan, "CM bial Tuirial Airfield-ah mi 794 awmin, cheng nuai 6.70 an dawn theih tur aṭangin first instalment nuai 1.67 an dawng tawh a, Tuirialah mi 910 awmin, an dawn tur nuai 7.67 aṭangin first instalment nuai 1.92 an dawng tawh," a ti a; eptu bial Bawraiah mi 923 awmin, an dawn tur nuai 8.12 aṭangin nuai 2.03 an dawn tawh thu a sawi.

MPCC Media hruaitute chuan, khawtlang hmasawnna atan rorel lai VC/LC neih kher a ngaih loh thu sawiin, "Ruling party nih vanga thlan tlinte hi an tlin hnuah an inluling deuh zel. Contract inchuha phe buai mai mai tur ruling VC/LC neihin awmzia a awm lo. Ruling party unit leh worker-te hnathawh ṭha lo thlir liam mai lo a, huaisen taka endik hnathawktu tur opposition VC/LC an ṭha ber. Khawtlang roreltu tur, mi ṭha, rin ngam tur i thlang ang u," an ti.

Eptu party hrang hrangte bakah chanchinbu leh TV lamah mithiamte'n mipui himna ngaihtuaha an ngennain awmzia a neih tâk loh thu sawiin MPCC Media hruaitute chuan, "Hripui léng karah LC/VC inthlanna neih a ni dawn ta. Chawpchilh taka buatsaih a nih avangin electoral roll pawh a buai nasa a, roll-a awm ṭhin awm ta lo te, chhungkua booth hran daiha dah an tam hle," an ti a, Aizawlah chuan swab sample test result nghak lai leh quarantine-a awm mek vote thlak thei lo tur an tam thu an sawi.

MPCC Media chuan, MNF sorkarin ram mipui hriselna leh himna aiin an party hamṭhatna an ngai pawimawh tih a chian thu sawiin, "VC/LC inthlan turah hian vote thlak turte'n ram mipui hriselna leh himna aia an party hamṭhatna dah hmasatu MNF sorkar thil tih dan kan duh lohzia lantir nan, an candidate-te vote lo turin kan ngen a ni," an ti a; hripui laka inveng tak chunga vote thlak turin mipui an ngen a ni.