Thuneihna thlâkhlelh vangin sorkarin inthlan an buatsaih lui - ZPM

ZPM party-a general secretary-te chuan nimin khan Aizawl Press Club-ah thuthar thehdarhtute an kâwm a; Mizoram sorkara thuneihna changtu MNF party chu thuneihna leh lalna an thlâkhlelh vanga village council leh local council inthlan buatsaih luiah an puh.

ZPM GS (Info & Publicity) Lalmuanpuia Punte chuan, VC/LC inthlan tur chu chhinchhiah tlak leh hriat reng tur a nih thu sawiin, "Khawvelin Covid-19 a buaipui a, kan State Disaster Management Committee-in 'Loh theih loh a nih loh chuan mipui páwn chhuah loh tur' tiin thupek a chhuah a, biak-ina inkhawm pawh a la theih loh hial a ni," a ti.

Lalmuanpuia Punte chuan, Mizo nih tinuamtu chhiatni ṭhatnia insâwng­bâwlna zawng zawngah pawh thupek khauh tak a awm zel tih sawiin, "Kan lainá leh ṭhian ṭha, chhungkhat laina pawh hripui léng vangin lungawi lo takin kan inthlah liam mek a ni," a ti a; chuti chung chuan VC/LC inthlan tur chungchangah thuneihna leh lalna thlakhlelh lutuk vangin sorkarin beng a chhut ngawn luih tlat thu a sawi.

ZPM General Secretary chuan, SEC-in Central YMA leh MPF-te a koh khawmah pawh, hripui vanga Aizawl khawpui lockdown mek a nih thu leh hripui a la darh mek zel nia a lan avangin inthlan chu a him loa an hriat thu sawi chhuah nia an hriat thu sawiin, "SEC hian an thuneihna a nih loh thu sawiin, inthlan buatsaih ngei tur a nih thu hriattirna an dawng nia hriat a ni," a ti.

Hripui léng karah vote thlak tura kal chhuah mi tam takin an hreh a rinawm thu sawiin Lalmuanpuia chuan, "Vote tla pawh a tlem a rinawm. Hei hi sorkar hian remchanga lain, ruling party-te chauhin vote thlâk se, awlsam têa chak an tumna mai niin a lang," a ti a; MNF thil tum a hlawhtlin loh nan ṭhahnemngai leh fimkhur taka vote thlâk ṭheuh turin ZPM chuan mipui an ngen tih a sawi.

ZPM hruaitute chuan, inthlang turin sorkar leh inthlan buaipuitute an la inpeih loh thu sawiin, "March 13, 2020-ah draft roll tihchhuah a ni a, July 29-ah final roll tihchhuah a ni. Hetih lai hian, final roll chu August 22-ah nasa taka khawih danglam leh a ni," an ti.

Electoral roll number chu hmun hrang hranga voter-te hnenah sem leh hriattir a lo ni tawh tih sawiin ZPM hruaitute chuan, "Political party hrang hrangte'n thâ leh hun kan séng thlàwn nasa hle," an ti a; sorkar leh inthlan buaipuitute an inpeih loh lai leh hripui vanga inthlan sawn hla tura opposition party-te leh mipui duh dan ngai pawimawh loa inthlan kaltlangpui tum a ni chu mak an tih thu an sawi bawk.