Sorkar hnathawk tan thuneitu sangah duh duha thu thlen remtih a ni lo

Mizoram sorkar chuan sorkar hnathawk leh sorkar hnathawk association-te'n duh duha thuneitu sang (chief minister, minister, MLA etc.) hnena thu thlen a remti lo.

DPAR chuan July 11, Ningani khan office memo­randum ti chhuakin, thuchhuah siam fo ni tawh mah se, sorkar hnathawk level hrang hrang aṭangin kalphung pangngai palzutin thu­neitu sang zawkte hnenah direct-a thu thlen an awm leh ṭhin tih a tarlang a, "Mimal bak­ah association ṭhenkhat chuan thuneitu dang leh hotu dangte hnenah mimal service ham­ṭhatna atan lehkha thehluh an ching hle. DPAR pawhin sorkar hnathawk pawl ṭhenkhat aṭangin service kaihhnawih thilah thuneitu sang zawkte leh thuneitu dangte hnena thu thlen a dawng nual," an ti.

Sorkar hnathawkin a hnathawhna chung­changa thu thlen duh a neih chuan a chunga thuneitu head of department/office hnenah a thlen tur a nih thu tarlangin DPAR chuan, "Thu­­neitute'n a dilna an ngaihtuah lo emaw, ti­khawtlai emaw a nih ngawt loh chuan thu­neitu sang zawk hnenah thlen loh tur," an ti a, thuneitu sang zawk hnenah thlen a ṭul a nih pawh­in danin a phût ang kalphungte a zawh ngei ngei tur a nih thu an tarlang.

DPAR chuan mimal transfer, posting, promotion etc. chungchangah service association ṭhenkhatin direct-in thuneitu sang zawk dangte hnenah thu an thlen ṭhin tih hriat a nih thu tarlangin, "Danin a sawi kalphung pangngai kal pela thuneitu sang zawk hnena thu thlen hi Central Civil Services (Recognition of Service Association) Rules, 1993 bawhchhiatna a ni. Administrative department zawng zawngte chu heng thupekte hi sorkar hnathawkte hriattir tura ngen an ni," an ti a, dan bawhchhiate chungah a ṭul anga disciplinary action lak theih a ni tih an tarlang.