MCC Freshers Social & Felicitation
Mizoram Christian College (MCC) chuan nimin khan Dawrpui Multipurpose Hall-ah zirlai tiṭhate chawimawina leh zirlai lut tharte lawmna 'Freshers Social & Felicitation' an hmang a, minister of state Lalnghinglova Hmar-in a hmanpui.
Lalnghinglova Hmar chuan, zir sang satliah belhchian dawl lo nih tum lo tura zirlaite chahin, "Zirlaibu mai bakah hriat zauna dangte pawh bih tam ula, college zawh huna kalzel dan tur ngaihven ràn chungin lehkha zir ang che u. Hlawhtlin leh hausak hi a awl lo a, a kawng a thui avangin awlsam taka neih kan tum tur a ni lo. Hemi tur hian theihtawp chhuah kan tum tur a ni," a ti.
Zirlaite chu Pathian ṭih leh taima taka lehkha zir tura fuihin Minister chuan, "India ram gross national income 34% chu kum 15-29 inkarte sum lakluh a ni a, in puitling tawh tih inhriain ruahmanna ṭha neih tum ang che u. India ram pumah hun inang hman a nih avangin hmarchhaka awmte'n state dangte leh kan hnaivaia awm ram dangte aiin hun kan hloh nasa a, zirlaite'n hun vawn dik leh daihzai thei ang bera hman tum ang che u," a ti a, zirlaite chu tih dan ṭha lo leh nunkawng hrisel lo an lo zawh palh a nih pawihin, sim nan khua ala tlai lo tih hre reng turin a chah.
MCC principal Dr Tawnenga chuan zirlai thar 137-te lawmluhna leh ṭawngṭai sakna hun a hmang a; zirlai tharte chu admission an tih laia an thuchah vawng reng tur te, thawkrim tur leh an hun vawng ṭhaa lehkha zir hunbi felfai tak siam turin a chah a ni.
He hunah hian MZU under-graduate examination 2024-a MCC aṭanga rank holder pathum bakah, department tina tiṭha berte hnenah chawimawina hlan a ni.
Mizoram Presbyterian Kohhran enkawl Mizoram Christian College (MCC) hi October 5, 2020-ah din a ni a, Tanhrila an college hmun tur chu peihfel a la nih loh avangin Mission Vengthlangah an awm mek. Principal bakah zirtirtu 31, non-teaching staff pariat leh zirlai 313 an awm a; arts, commerce leh management stream-ah subject pasarih zirna an kalpui mek a ni.