District hospital-a pharmacist nei lote pe vek turin hmalak mek a ni - Health Minister
Health & Family Welfare minister Lalrinpuii chuan nimin khan Lawngtlai khawpuia district hospital, Lairam Christian Medical Centre & Hospital (LCMCH) leh Christian Hospital Lawngtlai-te a tlawh. Minister chuan, district hospital-a pharmacist la nei lote pe vek tura hmalak mek a nih thu a sawi.
Lalrinpuii chuan, damdawi-ina thawkte chu hna ropui tak thawktu, mipui innghahna lian tak an nihna hre reng turin a chah a, "Damlote hi an pawimawh ber a, a enkawltute pawhin khawngaih leh lainatna, zaidamna nena enkawl a ṭul. District hospital-a pharmacist la nei lote pe vek tura hmalak mek niin, District Hospital Lawngtlaiah pawh pek nghal a ni ang," a ti a; Mizoram health care system-ah sorkarin theihtawp a chhuah mek thu a sawi.
Health department-ah indaih lohna a nasat thu leh chak zawka hmalak mek a nih thu sawiin Health Minister chuan, "A tahtawla thil tih a ngaih ṭhin avangin kan nghah thiam ve pawh a ṭul hle. National Health Mission (NHM) staff-te an pawimawhin an ṭangkai hle a, Mizoram health care system thâ tichaktu an ni tak meuh. Administration ṭha tak awm turin chief medical officer leh medical superintendent an pawimawh hle," a ti.
Lawngtlai District Hospital-ah hian khum 50 awmin, doctor 11 an awm mek a; damdawi-inin mamawh a neih an thlente chu Health Minister chuan a theih ang anga tihhlawhtlin a nih tur thu a hrilh.
LCMCH hotute'n dialysis khawl leh Blood Bank licence an mamawh thu leh CHL-ten ultrasound khawl an mamawh thu an thlente chu Health Minister chuan tihlawhtling ngei a tum thu a hrilh bawk.
LCMCH hi kum 2001-ah din niin, khum 60 leh doctor pasarih an awm mek a; Christian Hospital Lawngtlai hi kum 2007 khan din a ni a, khum 40 leh doctor pahnih an awm mek a ni.