KHAWTHLIR

Thisen pe

Salvation Army Youth, Central South Division chuan nimin khan Serchhip District Hospital tan thisen unit 35 an pe a, petute mipa 27 leh hmeichhe pariat an ni. Pachhunga University College NSS Unit pawhin nimin khan Civil Hospital, Aizawl Blood Bank tan thisen unit 401 an pe a, petute mipa 288 leh hmeichhia 113 an ni.

Infected area

Tunhnaia Serchhip Vengchung, Chanmari, Field veng, New Serchhip ‘S’ leh P&E Venga vawk thite chu African Swine Fever (ASF) vanga thi an ni tih finfiah a nih avangin henglai hmun hi vawk hri lenna, ASF Infected Area-ah puan a ni. Infected area aṭanga vawk, vawksa leh vawksa aṭanga siamte lakchhuah khap a ni a, vawk talh leh vawksa zawrh khap a ni bawk.

Rawtna thlen theih

State Transport Authority chuan Mizorama two wheeler taxi-te tan rawng in ang (prescribed colour) neih ṭha a ti a; two wheeler taxi rawng chungchanga rawtna thehlut duh tan August 16, 2024 thleng STA Secretary hnenah mahni hming, address leh contact number chiang taka tarlangin, rawtna sample colour (4 angles) a print thehluh tur a nih thu sorkar thuchhuahin a tarlang.

Solar bungrua pe

Solar Electric Light Company (SELCO) chuan nimin khan Baktawng Cluster hnuaia maimaw pangang (Eri) khâwi/vulhtu mi 14 hnenah nizung chakna thahrui hmang solar electric bulb leh solar light an pe a; mithiamte'n solar maintenance training an neihpui nghal. SELCO hian kum 2025 thlengin Mizorama Eri khawitu mi 1,500 hnenah solar bungruate hi pek an tum a ni.

Ton 10 aia rit khap

Bilkhawthlir leh Saiphai inkara thing lei (SPT bridge) dawhah bungraw phur lirthei metric ton 10 (kg 10,000) aia rit phur tan tlan khap a nih thu Kolasib SP chuan a tarlang a, "Thing lei hi a hlui tawh avangin hemi aia rit bungraw phur lirtheite'n an zawh chuan chetsualna a thleng palh thei," a ti. Thupek zawm lote chu MV Act 177&179 hmanga hrem theih an nih thu a tarlang.