Ni 14 inkhung tur ni mah se, Test-in inthlan nghawng dawn lo

Kolasib district-a VC inthlan tura polling party zinga mi, Bûkpui khuaa zirtirtu pakhatin Covid-19 a vei tih August 22, Inrinni khan hmuh chhuah ni mah se, election official dangte a nghawng dawn loa sawi a ni. 

Chutih laiin, sorkar thuchhuah hnuhnung berah chuan, contact tracing aṭanga swab sample endikte chu ni 14 chhung tal inkhung ngei tura tih a ni thung. Vanglaini palai zawhna chhangin Kolasib district election officer Dr H Lalthlangliana chuan, Bukpui khuaa zirtirtuin hripui a kài chhàwn theih awma ngaihte chu swab test tih vek a nih tawh thu a sawi a, "Kan test a, an negative vek. Kalkawnga motor-a a chuanpui te, a chaw eina leh heta a ṭhutpuite zawng zawng pawh. Hemi zingah hian Bûkpui aṭanga a rawn chuan thlâkpui pawhin a kai lo," a ti.

Bûkpuia zirtirtu hi August 19, 2020-a Kolasib-a election official-te training-ah a tel avangin, election official dang zingah thlâk ngai tur an awm leh awm loh zawhna chhangin Kolasib DEO chuan, "Awm lo, amah kha thlak a ngai a ni mai. Social distancing kan maintain sa deuh avangin, training hall-ah pawh khan tu'ma bulah a lo ṭhu lo sa hrim hrim a, mi dang chu buai tur a awm lo," a ti a; chuti chung chuan, nimin khan Kolasib-ah random test an ti a, election official zawng zawng an endik leh deuh vek thu a sawi.

Hetih lai hian, August 19, 2020-a Health Secretary-in hriattirna (notification) a chhuah­ah chuan, contact tracing vanga swab laksakte reng reng chu an sample a negative a nih pawhin, ni 14 tal inkhung tur a nih thu tarlan a ni. Health Secretary notifi­cation-ah chuan, "Mi tu pawh contact tracing atana swab sample laksakte chu, an chen­puite nen, result a chhuah hma chuan ni 14 chhung an inkhung hrang tur a ni a, an inkhung hranna hmun an chhuahsan tur a ni lo. An test result hi a negative a nih pawhin a chenpuite nen sorkarin qua­rantine hun tura a ruat hi an hmang zo ngei tur a ni," tih a ni.