Buh hùm lei dan tur ngaihtuah mek a ni - Agriculture Minister

Agriculture minister PC Vanlalruata chuan nimin khan Vaphaiah Khawbung Block Agriculture Office leh Animal Feed Processing Plant a hawng a; "Chief Minister kaihhruaina hnuaiah buh hùm lei dan tur ngaihtuah mek a ni," a ti.

Block Agriculture Office (BAO) leh Animal Feed Processing Plant hawnna inkhawm Vaphai Community Hall-a neihah PC Vanlalruata chuan BAO Office hawn a nih theih nan a sulsutu sorkar hmasa leh official-te chungah lawmthu a sawi a, Vaphai leh a chhehvel khuaa kut hnathawktu ten tangkaia tak an hman theih nan duhsakna a hlan a ni.

Agriculture Minister chuan Mizoram sorkar tharin kut hnathawktute chàwikàn a ngaipawimawh ber tih sawiin, "He mi tihlawhtling tur hian sorkar kalphung (policy) pawh duang a ni a, kut hnathawktuten awlsam zawka thlai thar an hralh theih nan sorkarin sawhthing, aieng, hmunphiah leh hmarchate rate mumal tak a bithliah tawh. Thlai dang pawh tih chhoh zel tum niin Chief Minister kaihhruaina hnuaiah buh hùm lei dan tur ngaihtuah mek a ni," a ti.

Thlai rate mumal tak bakah, kut hnathawktute tan crop insurance tih chhoh tum a nih thu sawiin PC Vanlalruata chuan, "Sorkarin kut hnathawktute hma khua atan sum leh pai hman a tum a, mipuite chu sorkar aṭanga hamṭhatna dawngtu beneficiary mai ni loin, sorkar thawhpuitu partner-ah ngaih an ni," a ti a, hmasawnna rahbi nghet leh tluantling zawh puiah kut hnathawktute a sawm.

Cooperation minister ni bawk PC Vanlalruata chuan, primary agriculture credit society (PACS)-te chu sorkarin bank-te tih theih ang zawng zawng ti ve thei turin a thuam tih a sawi a, "Mipuiten ṭangkai lehzual zawka an hman theih a ṭul, " a ti a; PACS chu mipui rawngbawlna pawimawh tak a nih angin hruaitute chu mipuite tan inhnukhniam tur leh thawhhona boruak ṭha tak siam zel turin a chah.

Khawbung Block Agriculture Office hi Border Area Development Project 2013-2014 sum cheng nuai 10 hmanga sak a ni a, Khawbung RD Block hnuaia khuate a huam.

Animal Feed Processing Plant hi Vaphai Primary Agriculture Credit Society-te din niin, warehouse, pisa, kudam, transformer leh a panna kawng laih nan cheng nuai 47 sèn a ni a; Cooperation department chuan Pradhan Mantri Janjatiya Vikas Mission hnuaia Van Dhan Vikas Kendra kaltlangin thlai herna khawl leh hriak herna khawl an bunsak a ni.