Graduate-te chu mahni inrintawkna khawp thiamna nei tawh tura beisei an ni - Minister

Helen Lowry College chuan nimin khan an auditorium-ah Graduation Programme vawi 3-na an hmang a, minister of state Prof. Lalnilawma'n a hmanpui. Minister chuan, zirlai graduate-te chu mahni inrintawkna khawp thiamna nei tawh tura beisei an nih thu a sawi.

Prof. Lalnilawma chuan, zirlai graduate-te zahawm taka nun vawng tur leh mahnia eizawnna inhaikaw thei tawh tura beisei an nih thu sawiin, "New Education Policy 2020-in kalphung a duan angin graduate tawhte chu an mahni zir subject an thiam hle tura beisei a ni, " a ti a, zirlaite chu thil thar ngaihtuah chhuak thei tura rilru seng thiam tur leh a ṭul hunah leadership quality lan chhuah tir thei tur an nih tawh thu a sawi.

Graduation Day chu zirlaiten hma lam hun êng tak nei chunga hmasawnna kawng an zawh zel theih nana kawng inhawnna a nih thu sawiin Prof. Lalnilawma chuan, "Taimakna leh thawhrimna nen zirna in sang paltlanga graduate in nih tawh angin in zir thiam tawhte chu faina kawngah te, mahni invawn leh inthunun theihna kawngahte tilang fo ang che u," a ti.

Minister chuan ruihhlo chu hmasawnna tikhawtlaitu leh tithuanawptu a nih avangin ruihhlo laka fihlim tlat turin zirlaite chu a chah a, an hlawhtlinna a lawmpui thu sawiin, an kal zelna turah duhsakna a hlan nghal bawk.

Khualzahawm Pastor Dr Biakzidinga Renthlei, Mizo Conference of Seventh–day Adventist president pawhin thu sawiin, zirlai hlawhtlinna changte chu chhungkua, khawtlang leh India ram khua leh tui ṭha ni tura rinawmna leh hmasawn tumna nen hma lam hun zawh turin a chah.

Helen Lowry College-ah hian arts leh commerce stream-ah zirlai 127 an awm mek a ni.