Assam Rifles dawr an nih danah Mizoram sorkar timualphoah puh

MPCC chuan nimin khan Congress Bhavan-ah friday political session an hmang a, thusawitu MPCC sr. vice president Lalnunmawia Chuaungo chuan chief minister Lalduhoma'n Assam Rifles-te a dawr dan chu Mizoram sorkar tihmualphona a nih thu a sawi.

Lalnunmawia Chuaungo chuan Assam Rifles sawn chhuah chungchang July 4, 2024 khan Chief Minister kaihhruaia sawiho a nih thu sawiin, "Minister pali laiin an ṭawiawm laiin, AR lam aṭang chuan IGP a tel. IGP level nena sawiho tur chuan Chief Secreatry chin nena sawiho tur a ni. Protocol a awm a, sorkar function-ah thil pawimawh a ni," a ti.

Chief Minister-in Assam Rifles IGP dawr tura amah ṭawiawm tura minister pali a sawm chu tihdan phung a ni lo tih sawiin MPCC Sr. Vice President chuan, "Mizoram sorkar an timualpho a ni. Sorkar anga indawrnaah IGP level Chief Secretary khan a lo dawr tur a ni. Hei hi international level thlenga tihdan phung a ni," a ti a, CM chuan a hnuaia office-te dinhmun thlengin a tihhniam thu a sawi.

Lalnunmawia chuan Union Home Minister-in Assam Rifles insawn chungchanga MoU draft kar khat chhunga chinfel tum a nih thu a sawi chungchangah a rilru khawih deuh a awm tih sawiin, "Sorkara ka awm ve lai khan MoU draft kan thawn a, central lam khu an ngawi hmiah a ni. Chutih lai chuan anmahni lam hian MoU tur lam hi an lo siam ve a, mahse ziakin min pe lo," a ti.

Assam Rifles MoU draft aṭanga a lan danin, loch house, quarter guard leh mandir-te hi chhuahsan an tum lo nia a lan thu sawiin Lalnunmawia chuan, "Union Home Minister-in MoU a ram neitu Mizoram mipuite rawn loa a rawn finalise tur hi a dik lo," a ti a, sawiho a, state sorkar nena thutlukna siam tur a nih thu a sawi.