Mizoramah BJP-in hma a sawn - BJP Mizoram
BJP Mizoram Extended State Executive Meeting July 11, Ningania an pisa-a neih chuan resolution eng emaw zat pawmin, Mizoramah BJP-in hma a sawn niin an tarlang.
BJP Mizoramah chuan Mizorama political party zawng zawng leh pawl ṭhenkhatte'n BJP chu Kristiante hmelma leh sakawlh ang hialin an sawi ṭhin nia tarlangin, "Dawt hmanga mipui an zirtir ṭhinah Mizoram mipuite'n thudik an hre chho mek zel a, Mizoram chhunga election tinah BJP-te vote duhtu leh BJP vote share-in nasa taka hma a sawn. Lawmawm kan tiin, Mizoram mipuite chungah lawmthu kan sawi a ni," an ti.
Mizorama dan loa sumdawnna chi hrang hrang leh ruihhlo hluar ta hle nia tarlangin BJP Mizoram chuan, "Nitin deuh maia kan ṭhalai duhawm tak takte'n nunna an chan zawih zawih ta hi pawi kan ti. Smuggling leh ruihhlo hmanga sumdawnna chuan zual lam a pan ta zel hi kan state sorkarin a tih tur a tih loh vang a ni," an ti a, smuggling leh ruihhlo zalenna state-a Mizoram chang mek hi titawp turin Mizoram sorkar an phut.
BJP Mizoram chuan Mizorama kan sorkar hrawn tawhte leh hrawn mekte'n an tih tur an tih tawk loh avangin khuarel chhiatna anga ngaih theih a thleng mek nia tarlangin, "Pawi kan ti hle. Tin, khuarel chhiatna pangngai tuar mekte chhawmdawlna kawngah pawh Mizoram sorkar hian a tih tur a titawk lo hleah kan ngai a ni," an ti.