Sipai bângte'n Home Minister an kawm

Home minister K Sapdanga chu nimin khan a pisaah Mizoram Ex-Services League (MESL) Headquarters hruaitute nen an inkawm. Sipai pension tana sorkar hna hauhsak (reservation) chungchang an thlenah, Home Minister chuan theihtawp chhuaha hma a lakpui tur thu a hrilh.

MESL hruaitute chuan Home Minister hnenah hian Mizoram Public Service Commission (MPSC)-in assistant sub-inspector of police post 20 a lak turah sipai bângte tan reservation siam a ni lo chu pawi an tih thu an sawi a; sorkarin dan a siam anga sipai bângte'n an chanvo an chan theihna atan hmalakpui turin an ngen.

K Sapdanga chuan, sipai pension-te chu ram tana an thawhnate an hriat reng thu sawiin, an chanvo an chan theihna atan theihtawp chhuaha hma a lakpui tur thu a hrilh a ni.

Inkawmhonaah hian MESL hi an president Lt. Col. Clement Lalhmingthanga, MLA bakah, Lt. Col. ZS Zuala, Wg. Cdr. HL Risanga, Sgt. Dr Ronald, Sub. Maj. R Lalthupuia, PO C Lalsiamkima leh Hony. Capt. B Sanga Sailo-te an tel a ni.