Myanmar aṭanga kan unaute lo chhuk ṭhenkhatte'n ruihhlo an tawlh ṭhin a, a pawi hle - Minister

Social Welfare minister Lalrinpuii chuan nimin khan Lawngtlaia Lairam Rescue Centre main building a hawng. Minister chuan, "Myanmar aṭanga kan unaute lo chhuk ṭhenkhatte'n ruihhlo an tawlh ṭhin a, a pawi hle," a ti.

Lalrinpuii chuan, sorkarin ruihhlo do a ngaih pawimawh avangin mimal leh pawl ruihhlo do ṭhinte chu sorkarin a thlawp tlat thu a sawi a, "Sorkar tan ruihhlo hi do hneh a harsa a, NGO leh Kohhrante thawhpuina a mamawh tak zet. Myanmar aṭanga kan unaute lo chhuk ṭhenkhatte'n ruihhlo an tawlh ṭhin a, a pawi hle a ni," a ti a, Myanmar aṭanga ruihhlo tawlh chingte man chhuah kawngah sorkar puihtu ni turin Lairam mipuite a sawm.

Ruihhlo do kawngah mumal leh uar zawka inzirtirna kalpui a ṭul thu sawiin Social Welfare Minister chuan, "Kohhranten program in neihna hrang hrangah ruihhlo ti lo tura inzirtirna uar zawka kalpui turin ka ngen che u a ni. Mizoramah chuan mi tin kan inpawhin ṭhianho nena inkawmkhawm ngaina mi kan ni a, heihi mi tam takin ruihhlo tih ṭan nan an hman châwk avangin fimkhur a ṭul hle," a ti.

Lalrinpuii chuan Social Welfare deparment leh ruihhlo ngai enkawlna in-te thawhho a ṭul thu te, Mizorama ruihhlo ngai enkawlna hmun aṭangin mi ṭhahnem tak enkawl dam an nih tawh thu leh mi ṭha tak takah chherchhuah an nih fo thu te a sawi a; Lairam Rescue Centre pawhin taksa leh rilru damna nen mi tam tak an enkawl chhuah a beisei thu a sawi bawk.

Lairam Rescue Centre-ah hian superintendent pakhat leh thawktu dang 10-ten ruihhlo ngai mi 12 an enkawl mek a; centre main building hawnna inkhawm hi Rev. Dr LH Lalpekhlua'n a kaihruaiin, Home superintendent Rev. Lianchhunga pawhin thu a sawi a ni.