ZPM-te hi an sorkar hmaa an intiam loh ang zelin an khawsa - MNF Adviser

MNF chuan nimin khan an pisa-ah chhung inkhawm an hmang a, thusawitu MNF adviser K Lalrinliana chuan ZPM-te chu an sorkar hmaa an intiam loh ang zela an khawsak thu a sawi.

K Lalrinliana chuan ZPM sorkar kal dan a demawm tih sawiin, "An sorkar hmaa an intiam ang lo zela khawsa an ni. Kan ti ang an tih chu kan ti lo ang, an tihna. ZPM sorkarin an in sawi angin hmunphiah chingtute agency kal tlangin hmun­phiah lei sak a tiam a, Hmunphiah chingtute nasa taka an buai," a ti.

Hmunphiah ching­tute an buai laiin Chief Minister chuan 'he thilah hian sorkarin thiam loh a nei lo, agent-te thiam loh a ni, kan tuar tlâng a ni ber' a tih thu sawiin MNF Adviser chuan, "Chief Minister hi mawhphurhna la ngamlo a nih zia a tilang a ni," a ti a, CM chuan 'kan lo ti dik tawk lo a ni' ti ngam se a duh thu a sawi.

K Lalrinliana sawi danin, contractor hnaah nasa taka an mite induh­sakna a awm. A thawk tur dik takten thawk loin duhsak zawng an inpe nasa. Sum inrenchema ṭanlak tum si, nasa takin an ti lapse a, Mizoramin changkan aiin hniam lam a pan zel a ni.