Fire Prevention Week 2015 hawn a ni NE-ah ram tikang nasa ber nia hriat kan ni - CM

January 19-24 chhunga hman tur 'Fire Prevention Week 2015' chu nimin khan chief minister Lal Thanhawla'n I&PR auditorium-ah a hawng. Lal Thanhawla chuan, Mizoram chu India hmarchhaka ram tikâng nasa ber nia hriat a nih thu a sawi a, Mizote chu sava leh sangha túra hrâi chíng hnam kan nih thu a sawi bawk.

Fire Prevention Week hawn­na hi Environment & Forest minister Lalrinmawia Ralte-in a kaihruai a; Chief Minister chuan, "Forest Survey of India chhût danin kum tin Mizoramah sq.km. 980 vel ram a kâng ṭhin a, India hmarchhakah ram tikâng nasa bera hriat kan ni. Tunlai khawvel changkang tawhah chuan a zahthlak hle," a ti.

Lal Thanhawla chuan, ram kâng lai hmuhnawm thlira thlir ṭhalai zingah an la awm thu sawiin, pawi a tih thu a sawi a, "Thil siam zawng zawng hnenah Chanchin Ṭha hril tura kohte kan ni a, nungchate leh thing leh mau thleng phâka kan hril lo hi a pawi hle," a ti. "Thing leh mau duat lo a, sava leh sanghate túra hrâi chíng hnam kan ni a, a zahthlak hle a ni," a ti bawk.

Kan ram chu hring mawi ringawt mah se lawm tur a nih loh thu sawiin Chief Minister chuan, "Ramngawin a khuh tak tak chu ram zau zawng aṭanga chhûta sawma pakhat pawh a tling lo. Kan ram thing leh maute hi humhalh ṭheuh ila, tuna hma kan lak loh chuan ṭhangtharte'n kan thlanah anchhia min lawh ang tih a hlauhawm a ni," a ti.

CM Lal Thanhawla chuan, kum tin Green Mizoram Day pualin tha leh zung, sum leh pai tam tak sên ral a nih ṭhin thu sawiin, "Thing phunte hi a ṭhang lian ta maw tihah thu âwih lote'n road side reserved zah miah loin an vât a, an hâl zui ṭhin. Road side reserved venhim kawngah hian department leh mipuite'n hmalak a hun tawh hle," a ti a; ram kâng tam tak chu sapêl mite fimkhur loh vang leh an huan/lo ramte meilam sial hmasa loa hâl ṭhin vang a nih thu a sawi.

Chief Minister chuan, kâng­mei venkawngah MLA 40-te'n an bial ṭheuha khaw tin V/C-te leh YMA hruaitute nen ṭan lak dan zawng se a duh thu a sawi bawk.

PCCF Lalramthanga tarlan danin, Fire Prevention Week hi kum 2000-ah hman ṭan a ni a, hman a nih chhan chu - nasa lehzuala ramngaw leh nungchate humhalh inzirtirna hun hman a nih theihna atan a ni.

Fire Prevention Week hawn­­naah hian minister pahnih - R Romawia leh H Rohluna, deputy speaker R Lalrinawma leh parliamentary secretary Hmingdailova Khiangte te pawh an tel a; zirlai ṭhahnem tak an tel bawk.