Thisen sawngbawlna senso sawifiah

Health minister Lal Thanzara chuan, thisen sawngbawlna senso phu­hrûkna tura pawisa lak chu thisen man a ni lo tih hrethiam turin mipuite a ngen.

Thisen sawngbawlna atana thisen unit khata Rs. 550 lak a nih chung­chang hi nimina zenghri venna beihpui thlak hawnnaah sawiin, Lal Thanzara chuan, "National AIDS Control Organisation aṭanga thisen pekna hmanrua – blood bag, test kit leh mamawh dangte a thlawna dawn ṭhin chu tihtawp a ni. Heng hmanrua leina tur senso 25% hi state sorkar tum tura a phût bakah, ṭanpuina hrang hrang hmuh ṭhinte tihhniam vak a ni," a ti.

Health Minister sawi danin, miin thisen a thlawn­in pe mah se, damloin a hman theih tura thisen siam nan unit khatah Rs. 1,200 vel sên a ngai ṭhin a, kum khat chhungin cheng nuai eng emaw zat sen a ngai ṭhin a ni.