Thing man sa bo vangin hrem la nei lo

Environment & Forest depart­ment hotute chuan, Zuangtui leh Vairengtea red sanders an man sa eng emaw zat a bo tih loh chu thing man sa a tam thama bo a la awm loh thu an sawi a; thing an man sa a bo chungchangah an department mi hrem an la neih loh thu an sawi.

Vanglaini palai zawh­­na chhangin E&F hotute chuan, Vairengte leh Zuangtuia red san­ders an man a bo ṭhen chungchangah police-ah FIR an thehluh thu an sawi a, "Zuangtuia kan man hi chu a bo pawh a ni chiah lo. Court thutlukna changchawiin a neitute'n kan hriatpui lohin eng emaw zat an la chhuak a ni," an ti.

E&F hotute chuan, red sander chu lak luh leh thawn chhuah phal a nih loh thu sawiin, tuna an kawl laite pawh sorkar laipui thu angin, an lakna state Andra Pradesh lamah thawn thlak an tum mek thu Vanglaini palai an hrilh.

Zawhna chhangin E&F hotute chuan, Vai­rengte leh Zuangtuia red sanders an man sa a bo tih loh chu thing an man tam thama bo ala awm loh thu an sawi a, "Thing bo chungchangah hian E&F-a thawk hrem kan la nei lo. Zawhnate chu kan inzawt ve ṭhin. Hmun hnih a mi tih loh hi chu tlem te te bak a bo lo," an ti a; an thing mante chu a bo lohna atan hmun danga an phurh sawn dawnah pawh vengtu (escort) an tirh tel zel thu an sawi.