Hnahthial Lungleng-in vote thlâk dawn lo

Hnahthial South-III VC thar siam danah an lungawi loh avangin Hnahthial Lungleng Veng mipui, chhungkaw 130 vela mite chuan August 27, 2020-a VC inthlanah vote an thlâk dawn lo.

Lungleng Veng JAC-in an tarlan danin, Hnahthial South-I VC aṭangin Hnahthial South-III VC thar siam a ni a; South-I VC-ah Lungleng Veng chhungkaw 60 dah niin, South-III VC lamah chhungkaw 70 dah a ni thung.

Hnahthial Lungleng JAC chuan, an veng ṭhen darh zawnga VC thar siam an duh lohzia lantirna tur leh, inpumkhat taka awm an duhzia lantirin vote thlak loh an rel a, vote an thlak loh tur chhan an sawite chu: 

1.    VC Election 2020 hi kan lungngaihna leh kan khawtlang ṭhendarha kan awm bul 

inṭanna tur a nih avangin, August 27, 2020 (VC Election Day) hi Black Day-ah puangin, chhung tinte'n mahni inah puan dum kan zár vek dawn. Lungleng Venga voter 460 chuangte chuan kan vote hlu tak chu VC candidate tu'ma hnenah kan hlan thei dawn lo a, candidate zahawm tak takte pawh kan theih leh thiam ang pawhin kan pui thei dawn lo a ni.

2.    Mizoramah khawi veng mah ṭhen darha VC hranga dah luih hi a awm kan hre ngai lo. Khawtlang inrêlbàwlna bakah, kohhran leh Pathian ram thilin a tuar zel dawn nia kan hriat avangin, Lungleng hi VC khata kan awm leh theihna turin kan thiam leh theih ang angin hma kan la zel dawn.

3.    Lungleng Veng ṭhendarha kan awm chungchanga kan hma lam hun tur min ngaihtuahpuia min khawngaih leh lainattu Tuipui râl khaw hrang hrang - Tuipui-D, Darzo, South Vanlaiphai, New Kawnpui, Lungpuitlang, Muallianpui leh South Lunglengte chungah lawmthu kan sawi. Pathian ṭanpuina leh in mi ṭanpuina azárah engtik hunah emaw Lungleng Veng hi VC khata kan la awm ngei kan ringin kan beisei tlat a ni.

4.    Kan khawtlang dinhmun avang hian kohhrante kan rûm a, zan tin biak-inah ṭawng-

ṭaina hun hman zel a ni a, kohhran mite leh min khawngaiha min lainattu zawng zawngte min ṭawngṭaipui zel turin kan ngenin kan sâwm tak meuh a che u.