V/C inthlanah dan thar hman a ni dawn LC inthlanah non tribal vote thlak tir tum lo

20th January, 2015

Kumin February thlaa village council inthlan turah The Lushai Hills District (Village Councils) (Amendment) Act, 2014 an hman a ni dawn. Hetih lai hian, State Election Commission chuan Aizawla local council inthlana tribal ni lote'n vote an thlak theih lohna tura dan thar an duan chu Law & Judicial department-in an zir chiang mek.

The Lushai Hills District (Village Councils) (Amendment) Act, 2014 hman a nih dawn tâk avang hian V/C tinah hmeichhe tan seat siam hauh a ni dawn a, seat awm zat pawh tihdanglam a ni. He dan hi Assembly session hnuhnung berah pass a ni.

V/C inthlanah hian hmeichhia leh mipa candidate-te chu ballot paper rawng hran siam a ni dawn a, ballot box hranpa erawh siam a ni lo ang. Local council inthlanah erawh chuan hmeichhe tan seat hauh a ni dawn lo.

Hmeichhe candidate turte hi party affiliation ti an nih chuan reserved symbol tho an hmang dawn a; hmeichhiate'n nomination an file lo a nih chuan seat ruakin a awm ang a, SEC-in ṭul a tih hunah inthlanna a buatsaih leh ang.

Hetih lai hian, dan awm mekah local council inthlanah non-tribal-te'n vote an thlak theih avangin SEC chuan dan a siam ṭha a, chu chu enfiah turin SEC chuan Law & Judicial department-ah a thehlut tawh. SEC hotute chuan, local council dan thar hi local council inthlan leh hmasak berah hman hman an inbeisei thu Vanglaini an hrilh.

Kumina village council leh local council inthlan turah hian MLA electoral roll hman a ni dawn a, mahse non-tribal leh vote thlak thei lo tur dangte'n vote an thlak lohna atan electoral roll chu ennawn a ni ang. SEC chuan, electoral roll ennawn tur atan January 30, 2015-ah draft roll a tichhuak dawn a, February 16, 2015-ah final roll peihfel a tum a ni.

Electoral roll ennawnaah hian non-tribal leh thla ruk aia rei lo veng/khuaa awmte chu paih an ni dawn a, Gorkhali erawh permanent residence an nih chuan paih lo tur an ni. Roll ennawn hi vote nei lo turte'n vote an thlak lohna tur atan chauha tih a nih avangin, inthun luh thar theih a ni lo ang.

V/C seat leh hmeichhe seat zat

• Chhungkaw 200 aia tam lo-ah V/C member pathum an nei ang a, pakhat chu hmeichhia a ni ang.

• Chhungkaw 201-500 inkarah V/C member panga an nei ang a, member pakhat chu hmeichhia a ni ang.

• Chhungkaw 501-1000 inkarah V/C member pasarih an nei thei ang a, member pahnih chu hmeichhia an ni ang.

• Chhungkaw 1000 chuangah V/C member pakua an nei ang a, pathumte chu hmeichhia an ni ang.