District tinah Fire Prevention Week hawng

Nimin khan district khawpui hrang hrangah January 19-26 chhunga hman tur Fire Prevention Week hawnna in­khawm neih a ni.

Lungleiah chuan Saikuti Hall-ah Lunglei DC Ashish Madhaorao More-in a hawng a; thu sawiin, DC chuan, ram kângin ramngaw chauh a tichhe lo a, nungcha chi hrang hrang a tihchereu bakah, boruak ṭha lo a tihpun nasat thu a sawi a, "Ram kâng hian ruahtui tlak dan pawh a tihmumal loh ṭhin avangin mihring nunna chenin a khawih pawi thei a ni," a ti.

Lunglei SP Zosangliana tarlan danin, nikum chhung khan Lunglei district-ah hmun 34-ah ram a kâng a, bawlhhlawh paihna kâng chhuak 30, LPG vanga kângmei chhuak pathum, motor kâng pasarih leh in kâng 24 a awm a ni.

Lawngtlaiah chuan Central YLA Hall-ah Lawngtlai DC J Hmingthanmawia'n a hawng. J Hmingthanmawia chuan, thingkung leh thlai hringte chu mihringte nunna atan a thil pawimawh tam tak siam chhuaktu an nih thu sawiin, "Thing leh mau, kan ramngaw neih chhunte kan duat tur a ni. An tel loin mihringte hi kan nun theih loh avangin ram tikângtu chuan mihring nunna pawh a tikâng a ni," a ti. LADC sorkara Forest RO Albert Lalrinzuala'n ram kâng ṭhat lohzia a lem a sawifiah bawk.

Champhaiah chuan Veng­lai community hall-ah DC Sangdingliana'n a hawng. DC chuan, "Ramngaw, hnim leh nungchate ngaihsak lo a, a tichereu zawnga kan kal chuan keini mihringte zawk hi a tuar nasa ber tur kan ni . Kan tu leh fate ni tin inrêlbâwl dan tur thlengin kan khawih khawlo thei a ni,” a ti. YMA sub-hqrs. Champhai president VL Chama Hnamte pawhin thu a sawi a ni.

Serchhip-ah chuan Women Commission chairman Vanlalawmpuii Chawngthu, MLA-in Bazar kâwnah Fire Prevention Week a hawng a; thu sawiin, "Mizoramin hma a sawnna tur leh mipuite'n eizawnna changtlung tak kan neih theihna turin ram leilung hrisel kan mamawh a, chu mi tur chuan ram kâng tur kan vên ṭhat a pawimawh hle a ni," a ti. YMA sub-headquarters YMA, Serchhip president RL Chhuanawma pawhin thu a sawi.

Mamitah chuan Fire Prevention Week hi Mamit DC K Lalthawmmawia'n Siamliana Hall-ah a hawng. Week hawnna inkhawm hi DFO C Lalbiaka'n a kaihruai a; DC chuan chu mihring tana ṭhil tangkai ni mah se, a hman danah fimkhur loh chuan hun rei lo tê chhunga kutbénga mi siamtu a nih thu sawiin, "Mizoram mi cheng tam tak lo neia eizawng kan ni a, kum tina ram kâng hi lo atana kan vah lêt tam tam tak a ni ṭhin, " a ti a, lo hâl turte chu uluk taka meilam sial turin a chah a ni.