Zenghri vênna beihpui thlak ṭan

Nimin khan Mizoram pumah naupang kum nga hnuai lamte hnenah zenghri danna (polio vaccine) pek ṭan a ni. Polio vaccine pek rûnpui hi Aizawl Civil Hospital auditorium-ah Health minister Lal Thanzara'n a hawng.

Lal Thanzara chuan, India ram chu zenghri awm lohna ram ni tawh mah se, khawvel hmun ṭhenkhatah zenghri natna hmuh a la nih avangin fimkhur takin a ûm bona hna kalpui a la ṭul thu a sawi a, "He hri laka invenna vaccine hi nausen piang hlim aṭanga kum nga chinte chuan an la ngei tur a ni, " a ti.

Zenghri ûm bo beihpui hi India ramah sorkar laipui hmalaknain kum 1995-ah thlak ṭan a ni a, Mizoramah chuan kum khatah vawi hnih neih ṭhin a ni.

Kumina zenghri venna beihpui thlak chu India ram hmun dangah chuan January 18-ah ṭan a ni a, Pathianni a nih avangin Mizoramah chuan nimin khan ṭan a ni.

Health sub-center leh IPPI booth tinah zenghri venna a thlawna lak theih a ni a; tun ṭuma beihpui thlalah hian Mizoram pumah naupang 1,35,086 pek tum niin, IPPI booth 1,306 siam a ni.