Ṭhangtharte chher chhuah ngai pawimawh

Labour, Employment & Industrial Training (LE&IT) minister Lalrinmawia Ralte chuan, Mizoram hmasawnna atan ṭhangtharte chher chhoh a, an hmakhua thlirsak chu sorkar thil tum pawimawh berte zinga mi a nih thu a sawi.

Nimina Agriculture department conference hall-a Emporium Training & Consultancy Pvt. Ltd. aṭanga zir chhuakte hnena certifcate a hlannaah thu sawiin Lalrinmawia Ralte chuan, "Mizorama kan awm anga awm ngawt a remchang lo thei a, harsatnate'n min bawhbuai lohna turin an hnam tih dan kan hriat a pawimawh. Hnam hrang hrang tih dan a inang lo a, kan bula awmte zia leh tih dan kan hriatchian hma chuan kan lo zir lâwk a ngai a ni," a ti.

Lalrinmawia Ralte chuan, training chhuakte chu Mizo nih hrim hrim vanga state páwna harsatna an nei emaw, thil danga harsatna tâwkte chu sawi hreh lo a, a hnenah emaw LE&IT leh Mizoram Youth Commision hotute hnena hrilh ṭhin turin a chah.

Emporium Training & Consultancy-ah hian Mizo nula 40-te chuan Mizoram Building & Other Construction Workers Welfare Board leh Mizoram Youth Com­mission kaltlangin hospitality leh tourism & hotel management an zir chhuak a ni.

Sorkar thuchhuah tarlan danin, training chhuakte chu The Western Sohna & Resort, Hyatt Regency, AOI-Japanese Restaurant, The Park, Taj Gateway, Holiday Inn Resort, Radisson Blue, JW Marriote, ITC Windsor, Vivanta, Taj Bengal, Hotel Sea Princess, Mana & Company/Bedwin Grand Hotel-ahte hna an hmu nghal a ni.