Buhfai a harsat loh nan FCI-in ṭan an la

Food Corporation of India (FCI) chuan thuchhuah siamin, Bairabi pawhtu rel kawng zauh a nih vanga mega block awm mek avangin Mizoramin buhfaiah harsatna a tawh loh tur thu leh FCI-in theihtawp chhuaha ṭan an lak thu an tarlang.

FCI chuan, mega block avang leh fûrpui lo thleng turte avangin Mizoram mipui rilruah buhfai ei tur a awm loh hlauhthawnna a sawm nia sawiin, "Mizoramah harsatna a thlen loh nan FCI chuan theihtawpin hma a la mek zel a ni," an ti.

FCI chuan, Mizorama FCI kudam paruka buhfai quality ṭha tâwk chhêk ngah reng chu FCI mawhphurhna a nih thu a sawi rualin, FCI kudam aṭanga phurh chhuah leh retailer hnena thlen erawh chu Mizoram sawrkar mawhphurhna a nih thu an tarlang a, "Vawiin thlenga FCI kudam paruka stock dinhmun chu 102% aia sang a ni a, FCI kudama stock a khah tlat hi chuan a dang phurh belh zel ngaihna a awm miau loh avangin, thiar chhuah chak a nih poh leh kan dahkhat chak mai dawn a ni," an ti.

FCI kudama buhfaite chu thiar chhuah chhuahah Mizoram sorkara Food, Civil Sipplies & Consumer Affairs department hotute nen a huhoa endik hmasak zel a nih thu an tarlang bawk.