Lunglei dist-ah Central scheme hna thlirho

Lunglei District Level Vigi­lance & Monitoring Com­mittee chu nimin khan Lunglei Circuit House conference hall-ah chair­man CL Ruala, Lok Sabha MP leh co-chairman Ronald Sapa Tlau, Rajya Sabha MP hoin an ṭhukhawm.

Meeting-a an tarlan danin, MGNREGA hnuaiah kum 2014-15 chhungin Lunglei district-in cheng nuai 1263.5 an hmu tawh a, mipui tan ni 14 inhlawhna an siam tawh. IAY hnuaiah Central aṭangin mire­thei in sakna tur leh administration fund atan cheng nuai 124.254 hmuh a ni tawh a, mirethei 159 in sak ṭanpuina tur BDO-te hnenah pek tawh a ni.

IWMP hnuaiah hian state aṭangin cheng nuai 67.352 hmuh tawh a ni a, pro­ject 14 kalpui mek a ni. PMGSY hnuai­ah kawng 11 - Khawhri-Chawngtui, Mat lui-Lungmawi, Serhuan-Lamthai, Leite-South Mualṭhuam (pavement), Haulawng-Bualpui ‘V’, Tuichawng-Mati­sura, Tlabung-Diblibagh, Mau­zam-Puankhai, South Vanlaiphai-Mualianpui (pave­ment), Ṭawipui ‘N’-Mualcheng ‘S’ leh Thingfal-Mamte inkarte siam a ni.

Meeting-ah hian Lunglei district-a MLA pahnih - Joseph Lal­himpuia leh Chalrosanga te pawh an tel a ni.