Mizoramah BWA Day hmang

Nimin Pathianni kha khawvel puma Baptist kohhran inzawmkhawm pawl, Baptist World Alliance Day a ni a, Mizoram Baptist Kohhran pawhin nimin khan hmangin, BWA pualin tualchhung kohhran tinah chawhma inkhawmah hun an hmang. BWA Day thupui chu 'Ram chu Lalpa ta a ni' tih a ni a, inkhawm thawhlawm chu BWA pual niin, BWA headquarters, USA-ah thawn a ni ang.

Baptist Church of Mizoram hian kum 1978-ah BWA an zawm a; BWA inkhawmpui lian kum li dana neih ṭhin, Baptist World Congress chu kuminah Rio de Janeiro, Brazil-ah July 22-26 chhungin neih a ni dawn a, BCM pawhin palai an tir dawn a ni. BWA hi kum 1905-ah London khawpuia Exeter Hall-ah din a ni a, statistics hnuhnung ber 2017-a tarlan danin, ram 125 aṭangin kohhran hlâwm (convention/union) 239 an awm a, tualchhung kohhran 1,68,491 leh baptisma chang member 4,75,00,324 an awm a ni.