Bialtu MLA-in Buhchangphai a tlawh Sorkar a ngawi dawn lo - Rinthanga

Parliamentary secretary K Lalrinthanga chuan a bial chhunga Buhchangphaia Ram­thar Zau chu January 19, 2015-Assam Police leh Forest mite'n kal chilha an vau avangin nimin khan a tlawh a; Assam mite chu an lo kal leh a nih chuan Mizoram sorkar a ngawih mai mai dawn loh thu a sawi.

K Lalrinthanga chuan, mi­puite'n thlamuang taka an eizawnna an kalpui chu sorkar duhthusam a nih thu a sawi a, "Assam Police leh Forest mite'n kan leiletah kal chilha an lo vau fo mai hi Mizoram sorkar chuan a ngaithei lo. An rawn ti leh a nih chuan sorkar a ngawi mai mai dawn lo. Harsatna an rawn siam leh a nih chuan keini pawhin an state chhungah kalin, an mipuite chungah harsatna kan siamsak ve lo ang tih a sawi theih loh," a ti.

Parliamentary secretary hian Buhchangphai Ramthar Zaua leilet neitu, R Kapzuala leh RK Laldawngliana te bakah, leilet enkawltute chu a kâwm a, thla­muang taka awm turin a chah a ni.

Sorkar thuchhuah tarlan dan­in, Ramthar Zaua thil thleng chungchangah hian Thawhṭanni khan Kolasib SP chuan Hailakandi SP chu Mizoram chhunga hma la tawh lo turin a hriattir a ni.

Kolasib aṭanga thu dawn danin, Ramthar Zauah hian Vairengte SDPO hoin Mizo IR police 12 velin an awm chilh mek a, Kolasib SP-in a dil belh angin IR platoon khatin nimin tlai lam khan Buhchangphai an pan leh niin an sawi.

Buhchang branch YMA president C Lalhmachhuana chuan, January 19, 2015 zing dar 8:30 vela an chêt hnuah Assam Police leh Forest mite chu nimin lamah chuan thâwm an nei lo tih a sawi.