Khawthlir

P/S zirtirtu la thar
Mizoram Public Service Commission chuan nimin khan School Education department-a primary school zirtirtu (general) tur lakna interview result a tichhuak. Tun ṭuma MPSC-in result a tihchhuahah hian mi 67 lak an ni a, panel list-ah mi 21 an awm bawk.

Bûk tling lo man
Champhai district-a Khuangleng khuaa Consumer Union chuan, Puia Gas Agency-in nimina Khuanglenga gas a sem chu an endik a, bûk tling lo eng emawzat an hmu chhuak. Gas bûk a tlin lohna zawng chhût chhuakin, a semtu chu Rs. 7,700 an chawitir a, pawisa chu gas leitute hnenah an gas bûk tlin lohna milin an pe kîr leh a ni.

Assam dem
MZP chuan thu­chhuah siamin, Assam Police leh Forest mite'n Mizoram chhung Buhchangphaia Mizo leilet thlám ṭhiahsaka an vau leh ta chu pawi an tih thu an tarlang a; an lo kal leh a nih chuan hmachhawn turin Mizoram sorkar an ngen a, "Ramri leh a chhehvelah sipai tam zawk a ngheta dah an nih theih nana hma la turin sorkar kan ngen a ni," an ti.

Thlai tharin tanpui
Hortoki khua nûl siama eizawngte chuan Thawhṭanni khan TNT, Zuangtui hnenah an thlai chi hrang hrang - mai, maite, maian, anhling leh thlai dangte 207 motor phur khat an pe. Hortoki khuaa nûl siamtute hian Tlawng lui kamah TNT hnena ṭanpuina pek tur thawhlawm dah khawmna an siam a, chutah chuan nul siamtute'n an remchan ang thlai an thawh khawm a ni.

Heroin man
Excise & Narcotics department-a Anti-Narcotics Squad-te chuan Thawhṭanni chawhma khan Bawngkawnah heroin gram 15 leh a neitua puh Kaineihchuaii (45) d/o Dailova (L), Champhai Dinthar Veng nia inchhál an man a, NDPS Act hmangin thubuai an siamsak.