Agriculture Minister-in Khamrang a tlawh

Agriculture minister R Lalzirliana chuan, nimin khan Khamrang ram chhunga mimal leh society-te'n ṭhelrêt, oil palm, balhla, hmunphiah leh lakhuihthei ṭiak chìnna hmun a tlawh.

R Lalzirliana hian huan chhung, thlai kung, tui dah khawlna, drip irrigation system, Tlawng lui kam leh lam aṭanga ràl leh lama thlai rah phurhna tur quintal nga phur theihna ropeway siam mekte leh inkalpawhna kawngpuite a endik a ni.

Agriculture Minister hian huan neitute harsatna lian ber - kawngpui diak lai leh chhe laite chu siamṭhat a nih tur thu a sawi a, loneitute chu Agriculture lama mithiamte chhawr ṭangkai thiam turin a chah.

Agriculture deputy direc­tor (oil palm) RK Nithanga chuan, oil palm chu ft. 30-a inhlata phun a ngaih avangin huan zau tak a ngaih thu a sawi a, "A puitlin hmain kum khat chhungin kung pakhatah a rah vawi 12 seng theih a ni tlangpui. Kung pakhat vawi khat rahchhuah, fresh fruit bunch(FFB) hi chawhrualin kg. 25 a ni," a ti.

Agriculture Minister hi Soil & Water Conservation minister Lalrinmawia Ralte, Kolasib DC Jitendra Yadav, Kolasib SP RP Meena leh Agriculture director Dr C Lalzarliana teleh a ni.