Gas agency thenkhatin sorkar thu an zâwm lo

Sorkar laipuiin ei rawng­­bawlna gas (LPG) chung­changah kalphung thar a siam, Direct Benefit Transfer Scheme chu a taka kalpui turin buaipui mek a ni a; he­tih lai hian, gas agency ṭhenkhat chuan sorkarin pawisa lak zat tur a bithliah aia tam daih pawisa an la nia thu dawn a ni.

Food, Civil Supplies and Consu­mer Affairs department aṭanga thu dawn danin, tun dinhmunah Mizoram pumah gas distributor 42 an awm a, gas domestic connection 2,58,077 leh commercial connection 1,330 a awm. Distributor zinga 17 chu RGGLV hnuaia mi an ni a, RGGLV hnuaiah bik connection 14,160 a awm.

Sorkar thuchhuak

DBT kalpui dan tura Food Civil Supplies & Consumer Affairs director chuan zawm ngei tur hriattirna a chhuah tawh a; hriattirna chu zâwm ngei turin LPG distributor zawng zawngte a hriattir bakah, a zâwm lote chungah action lâk tur a nih thu a tarlang a ni.

Supply department-in thu­chhuah a siamah chuan, consumer-te'n bank account leh telephone number an thehluhna tur form mahah Rs. 5 aia tam lak phal a ni lo a, form fill-up thiam lote pawh distributor-te'n man awm loin an ṭanpui tur a ni. Hetih lai hian, sorkar thupek zâwm loin gas distributor ṭhenkhat chuan form manah Rs. 5 aia tam an la a, ṭhenkhat phei chuan Rs. 50 te an la nia thu dawn a ni.

Vanglaini - Gas Agency

Nimin tlai khan Vanglaini palai chuan Aizawla gas agency-te telephone-in a be kual a, agency pali a be thei. Biak theih agency palite chu - Biakkungi Gas Agency, Zopuii Gas Agency, Caravan Gas Agency leh Zothan Indane Agency-te an ni a; anni hian form man Rs. 5 an lak thu an sawi vek a ni. Zopuii Gas Agency chuan consumer card a bu hlui tawhte chu a tharin an thlaksak a, chumi atan chuan Rs. 50 an la tih an sawi.

Mipuite thu leh hla

Sorkar thupekin application form pakhat manah Rs. 5 aia tam lak a phal loh laiin, agency ṭhenkhat chuan Rs. 5 aia tam an la a; hei vang hian Mizoram Consumer Union (MCU), Venghnuai unit chu Supply department-ah ziakin an zualko nia thu dawn a ni.

Vanbuangi Gas Agency con­sumer eng emaw zat chuan form pakhat lei nan Rs. 50 laksak an nih thu Vanglaini an hrilh. M&B Indane, Khatla-a consumer ṭhenkhatin Rs. 50 an pek thu te, Zothan Indane Agency-ah Rs. 20, Suakchhunga Gas Agency-ah Rs. 20, Southern Gas Agency, Lunglei-ah Rs. 20, Kawlkulha gas ageny-in Rs. 50 an lak thu dawn a ni bawk. Hetih lai hian, application form leinaah hian receipt an pe tello niin an sawi.

Form pakhata Rs. 50 zel an lakna nia an consumer-te'n an sawi, Van­buangi Gas Agency hian domestic gas-ah consumer 18,724 an nei a, an consumer-te hian application form la vek ta se, form aṭanga an sum lak luh tur zat chu Rs. 9,36,200 a ni. Rs. 5 an laka an lak luh theih zat erawh chu Rs. 93,620 niin, a inthlauhna chu Rs. 8,42,580 a ni.

FCS&CA hotute thu

Supply department hotute chuan Vanglaini palai zawhna chhangin, DBT kalpuina tura gas distribution-te thil tih danah MCU leh mi eng emaw zat hnen aṭangin complaint an dawn thu an sawi a; a ṭul angin an enfiah zel a, dik taka ti turin an hrilh ṭhin niin an sawi.

FCS&CA hotute chuan, gas agency-te'n dik lo taka thil an ti a nih chuan, Supply department-in an tih theih chu dik taka ti tura hriattir a nih thu leh hrem theitu an nih loh thu an sawi a, "A hrem theitu chu Consumer Forum (Court)-ah te, police leh district magistrate-te an ni. Keini chuan Consumer Court-ah kan thlen thei a, company lamah kan thlen thei bawk," an ti.

Minister thu leh hla

Eirawngbawlna gas-a DBT scheme kalpui chungchangah hian Vanglaini palai zawhna chhangin, FCS&CA minister John Rotluangliana chuan, distributor-te'n sorkar thu kalha thil an tih thu eng emaw zat an dawn thu a sawi a, "Department angin dik taka ti tura hriattirna order kan chhuah tawh a, a copy distributor-te pek vek an ni," a ti.

John Rotluangliana chuan, sorkar thupek chu gas distributor-te'n an zâwm ngei tura a ngaih thu leh, Supply department hotute'n an en zui reng dawn thu a sawi a; January 30, 2015-ah gas distributor zawng zawngte ko khawmin, DBT kalpui tur chungchang an sawipui dawn tih a sawi bawk.