Mizoram-Assam ramri buaina: Vairengte daia kut inthlaknaah Assam mi 1 thi, Mizo 7 hliam
October 17, Inrinni zan tìr lam khan state ramri inchuhna kaihhnawihah Vairengte leh Lailapur inkarah buaina a chhuak a; Lailapur (Assam) lamah mi pakhat a thih bakah hliam eng emaw zat an awm a; Vairengte lamah mi pasarih hliamin, pakhat chu damdawi-inah enkawl mek a ni.
Inrinni zan tîr, thim hlimah Lailapur mi eng emaw zat chuan Vairengte dái, auto-rickshaw stand-a duty mek Mizoram police chu lungin an tâwng a, chumi hria chuan Vairengte khawtlang chu vantlang aurinna hmangin an inau khawm a, ramri lam an pan.
Vairengte ṭhalaite chuan auto-rickshaw stand thlang lama kawngpui kam, state pahnihte'n kutthlak loh ve ve tur tihna huam chhunga Assam lam mite'n tun hnaia in (râp-in) an sak zinga eng emaw zat chu an tichhia a, in 11 vel an hâl a ni.
Vairengte ṭhalaite hian Assam ho in sakte chu a tahtawla hâlin, Lailapur-a luh thlak an tum a, mahse, thuneitute'n an dan avang leh an chhuk thleng lo. Lailapur bulah Assam lam mite (Bangladesh aṭanga rawn pémte nia hriat) nen intibuaiin, kut an inthlâk tawn ta a ni.
Buainaah hian Vairengte lamah mi pasarih an hliam a; pakhat - Malsawmkima (30) s/o Lalsanglura, Vairengte Bangla Veng chu Kolasib District Hospital-ah hruai niin, admit a ni a, ngaihtuahawm erawh a ni lo.
Assam lamah chuan mi pakhat a thi a, hliam an awm nual bawk niin NE Live TV news chuan a tarlang a; hliam zinga pakhat chu Gungur Hospital, Silchar-ah admit a nia an hriat thu, Kolasib DC Dr H Lalthlangliana chuan a sawi.
October 16, Zirtawpni zan dar 8 vel khan Assam Police leh Forest mite chu Saihapui-V khuaa Mizoram Police checkgate leh village task force (VTF) duty post-ah kalin, an duty-na hmun chu chhuahsan turin an hrilh a, darkar hnih hnu velah an rawn enfiah leh tur thu an sawi.
Saihapui-V duty post-ah hian Mizoram Police leh Excise mi pali an awm a; Assam police-te an kal avang leh chhuak tura an tih avangin Mizoram sorkarin police an dah belh nghal. An sawi lâwk angin Assam Police leh Forest mite chu Saihapui V-ah an kal leh a, buaina awm loin an kîr leh a ni.
October 17, Inrinni khan chawhma dar 11 velah Assam Police leh civil mi ṭhahnem tak chu Saihapui-V daia duty post-ah an kal leh a, Mizoram Police nen an inhnial hnuah Saihapui-V VTF duty post chu Assam civilian-te'n an ṭhiat. Chumi hnuah inbiak a ni a, state pahnih police-te chu tawlh kiang ve ve tura tih an ni.
Assam civil mite'n Saihapui-V VTF duty post an ṭhiah lai hian Mizoram police eng emaw zat an awm a; an silaite nen inring mah se hotu lam aṭanga thupek a awm loh avangin an dang lo nia thu dawn a ni.
Inrinni tlai lamah ramri-ah hian Saihapui-V ṭhalai eng emaw zat chu an kal leh a, Assam Police ṭhahnem tak an la awm laiin, Mizoram Police erawh chu an awm tawh lo. Mizo ṭhalaite leh Assam police-te chu an innawr buai deuh a, buaina lian zawk chhuak loin Mizote chu an tawlh kîr a, Mizoram police an awm ve lo chu an dem thu an sawi.
Hetihlai hian Mizoram sorkar chuan nimin lam khan police eng emaw zat a dah belh niin thudawnna chuan a sawi.