AMC-in Aizawl bawhhlawh paih nan Thla tin Rs. 33,41,120 an sêng thin

Aizawl Municipal Council chuan, Aizawl khawpui chhung veng hrang hranga bawlhlawhte public private partnership (PPP) mode hmanga paih nan thla tin Rs. 33,41,120 an sêng ṭhin.

AMC executive councillor (Sanitation) C Lalsawivunga'n Vanglaini palai a hrilh danin, PPP mode hmanga Aizawl khawpui chhung bawlhlawh paih zat chu thla khatah lirthei MMV trip 1464 leh LMV trip 768 a nih tlangpui a, bawlhlawh paihte nawr fai nan JCB mimal ta man chawia hman ṭhin niin, chuta tan chuan thla tin Rs. 1,20,000 sên ṭhin a ni. Tunah erawh chuan AMC-in JCB thar an lei tawh a, chumi hmang chuan an nawr liam ṭhin a ni.

C Lalsawivunga chuan, Rs. 6,40,000 sêngin Tuirial bula bawlhhlawh paihna (dumping ground) hman mekah bawlhlawh ṭawih thei leh ṭawih thei lo thliar hranna hmun tur, Waste Resource Center sak zawh tawh a nih thu a sawi a, "SIPMIU nena ṭangkawpin a takin hna ṭan thuai a ni ang," a ti.

C Lalsawivunga chuan, Tuiriala dumping ground hman mek chu a khah tawh avangin hmun dang, bawlhlawh paihna tur an mamawh a, Hualngohmunah mimal ṭhahnemngaite'n ram an pe tih a sawi a; Hualngohmun ramah chuan bawlhlawh paihna hmun siam vat an tum a, a siamna senso tur sum pawh an dil mek thu a sawi.

Councillor Lalsawivunga chuan, AMC-in êk paih motor hman a nei tih sawiin, a hman man chu vawi khat paihah Rs. 3,000 a nih thu a sawi a; AMC ek paih motor chu mipui tan hman ṭangkai theih a nih thu a sawi bawk.