Buhfai man Mizoram sorkar tihsan a ni lo - Congress party ṭhalai

Congress party ṭhalaite chuan thu­chhuah siamin, January 1, 2015 aṭanga buhfai man kg. khatah Rs. 9.50 aṭanga Rs. 15-a tihsan chu Mizoram sorkar tihsan ni loin, sorkar laipui tihsan niin an tarlang a, "Mizoram sorkar hian buhfai man hi a tisang ngai lo," an ti.

MPYCC chuan, politician ṭhenkhatte'n thu an sawinaah, Mizoram sorkarin buhfai man a tisang nia an sawi chu thu dik tâwk lo nia sawiin, "An hriat sual vang nge, an hriat tlem vang zawk, tih hi MPYCC zawhna a ni," an ti a; thu dik tâwk lo mipui hriata sawi chhuah chu pawi an tih thu an tarlang.

MPYCC tarlan dan­in, buhfai rate kg. khat Rs. 9.50 chu kum 2002-a hman ṭan a ni. Food Corporation of India aṭanga economic cost-a buhfai leina chu May 3, 2006-ah quintal khatah Rs. 1,350 a ni a, June 28, 2006-ah Rs. 1,597-ah tihsan a ni. May 22, 2008-ah Rs. 1,716-ah tihsan a nih hnuah, December 1, 2010-ah Rs. 2,751-ah tihsan leh a ni a, tunah Rs. 2,981 a ni mek.

MPYCC chuan, mipuiin buhfai an leina kg. khat man Rs. 9.50 a nih ṭan laia sorkarin mipui tana a tumsak (subsidise) zat chu Rs. 4.45 a ni tih sawiin, "Tunah erawh chuan economic cost-a kg. khata Rs. 15 kan ti chung pawh hian sorkar­in a mipui tana subsidy a pek chu kg. khatah Rs. 10.75 a la ni. Chuvangin, Central sorkar (FCI)-in buhfai hi vawi tam tak rate a tisang ṭhin a, Mizoram sorkar hian a tisang ve ngai lo zawk a ni tih hi mipuite'n hria se kan duh," an ti.

Congress ṭhalaite chuan, sorkarin buhfai man a tihsan, party ṭhenkhatten mirethei leh harsa zawkte rawkna ang hiala an sawi chu thu dik lo niin an sawi a, "Mi rethei zawk BPL leh AAY-te chanvoah a rate tihsan a ni lo a, rate ngaiin an la mek. Supply department-in buhfai man a tihsante chu Above Poverty Line, mi rethei leh harsate chunga mi an ni," an ti.