January 24 hmaa kawng siam turin phût

Lunglei South Ṭhalai Kawng Ṭha Duh Pawl (LSṬKṬDP)-te chuan, Lunglei Ramthar Veng (AOC) aṭanga Hrangchalkawn leh Hrangchalkawn aṭanga Zobawk inkar kawngpui chu kum 20 chuang siam mumal lohin a awm tawh niin an sawi a; January 24, 2015 ral hma ngeia siamṭhat a nih theih nana hma la ṭan turin sorkar an phût.

LSṬKṬDP hruaitute chuan nimin khan Aizawl Press Club-ah thuthar thehdarhtute an kâwm a; an chairman Ngurthansanga Sailo chuan, Lunglei-Zobawk kawng chu a chhiat em avangin Lunglei YMA sub-headquarters, YMA branch ṭhenkhat - Salem Veng, Lunglawn, Luangmual, Sethlun, Theiriat, Hrangchalkawn, Lungpuizawl leh Zobawk-te'n siamṭhat a nih theih nan hma an lo lak tawh ṭhin thu a sawi.

Ngurthansanga chuan, January 16, 2015-ah kawng chhia avanga an harsatnate Lunglei DC hnenah ziakin an thlen a, parliamentary secretary Joseph Lalhimpuia hmanlakpuinain January 19-ah minister of state for PWD Lal Thanzara an hmuh leh thu a sawi a, "Kumin chhung­a siam ṭha turin rua­hmanna siam ni mah se, fûr ruah tui tlak hma chuan hmalakna tak tak a awm thei dawn loh thu min hrilh a, kumin fûr hmain kawng chhe zualpuite siam ṭha tura hma an lak tur thu min hrilh bawk a, kan lawm hle a ni," a ti.

Ngurthansanga Sailo sawi danin, Ramthar Veng-Zobawk kawng, km. 8-a thui siamṭhatna turin sorkar laipuiin March 31, 2014-ah cheng nuai 493.04 a sanction tawh a; tender vawi li chhuah a nih hnuah pawh chhángtu an ṭhat tâwk loh avang­in December 8, 2014-ah tender chhuah nawn leh a ni.