Chanmari vengin Mizo H/S-ah lo chuan vote thlâk an tum lo

Chanmari Joint Action Committee on Local Council Election, 2020 chuan nimin khan Aizawl Press Club-ah thuthar thehdarhtute an kâwm a; August 27-a local council inthlan turah, ṭum dang inthlana vote an thlâkna ṭhin Mizo High School-ah vote an thlak dawn loh chuan, an veng mipuiin hmun dangah vote an thlâk loh tur thu an puang.

Chanmari JAC chairman Vanlalruata chuan, Chanmari veng din tirh aṭangin an veng mipuiin an veng chhunga Mizo High School-ah hlir vote an thlak ṭhin tih a sawi a, "Kum 2020 LC inthlana Chanmari polling sta­tion-a harsatna awm hi Zarkawt veng nawrna vang niin kan hria a, hei hian kan veng mipui ril­ru a tina em em a ni," a ti.

Vanlalruata chuan, LC inthlan­ah Mizo H/S-ah ngei vote an thlak theihna atan State Election Commi­ssion-in ruahmanna siamsak se an duh thu sawiin, "Kan veng pum tana vote thlâk duhna bera vote thlak min phalsak lo a nih chuan Chanmari veng mipui chuan hreh tak chungin vote kan thlâk lo ang," a ti a; polling official-te'n postal ballot hmanga vote an thlak tawh aṭanga tling an awm pawhin candidate-te'n an pawm loh tur thu a sawi.

Chanmari JAC hruai­tute'n zawhna an chhàn danin, an vengin vote an thlâkna turah tihfel chiah a la awm lo a, thuneitute'n an enchhin deuh chu social distancing atana hmun remchang lo takah an ngai a ni.

Chanmari JAC-ah hian YMA, MHIP leh MUP bakah, political party aṭangin MNF, Congress leh ZPM-te an tel.