Covid-19: Mizoram dinhmun Hripui vei hmuh tawh 2,253
October 16, Zirtawpni leh October 17, Inrinni khan Mizoramah Covid-19 vei mi 24 hmuh chhuah a ni a; Inrinni leh nimin khan hripui laka fihlîm tawh mi 15 chhuahtir an ni thung. Mizorama Covid-19 positive hmuh tawh zat chu mi 2,253 an ni.
Mizorama Covid-19 positive hmuh chhuah tawh mi 2,253-te chu mipa 1,838 leh hmeichhia 415 an ni. Mi 2,148 (95.34%) chu hripui laka an fihlîm tawh avangin chhuahtir an ni tawh a, enkawl mek mi 105 (4.66%) an awm. La chhuak lo zingah hian hripui vei tawh lo an awm nual bawk.
October 16-a hripui vei hmuh chhuahte chu - ZMC-a hmuh mi pakua, TrueNAT-PCR hmanga hmuh mi pahnih leh Rapid Antigen Test (RAT) hmanga hmuh mi panga an ni a; October 17-a hmuh chhuahte chu - ZMC-a hmuh mi pali, TrueNAT laboratory-a hmuh pahnih leh RAT hmanga hmuh mi pahnih an ni.
October 16, Zirtawpni khan Mizoramah mi 1,707-te swab sample endik a ni a, chu'ngte chu ZMC-ah 331, TrueNAT-PCR hmangin district pariatah mi 157 leh RAT hmangin district pakuaah mi 1,215 an ni. Mi 1,707 zingah Covid-19 vei mi 16 an awm.
October 17, Inrinniah chuan ZMC-ah mi 472, TrueNAT-PCR hmangin district pariatah mi 93 leh RAT hmangin district 11-ah mi 400, an vaiin mi 965 endik a ni a; hripui vei mi pariat hmuh chhuah a ni.
Hripui laka fihlim tawh mi 12 chu Inrinni khan chhuahtir an ni a, Lunglei Pukpui CCC aṭangin mi pariat, Saitual CCC aṭangin mi pahnih, Chhiahtlang CCC leh Lawngtlai CCC aṭangin mi pakhat ve ve an chhuak. Nimin khan Berawtlang CCC aṭangin mi pathum an chhuak bawk.
October 16-a hmuh chhuah:
Sorkar thuchhuah tarlan danin, ZMC laboratory-a hmuh chhuah mi pakuate chu Mizoram chhunga kai chhawng (local positive contact) vek an ni a; Covid-19 symptom nei pahnih an awm.
Mi panga chu Chanmari West veng mi, hmeichhia vek niin, kum 11, 18, 30, 51 leh 59-a upate an ni a; symptom an nei lo. Chanmari-ah hmeichhia pahnih, kum 46 leh 58 mi hripui vei hmuh a ni a, a naupang zawkin symptom a nei lo a, a upa zawkin a nei thung. Dawrpui vengah mipa kum 26 leh 41 mi hmuh chhuah a ni bawk a, a upa zawk chu local task force member a nih bakah, symptom a nei a ni.
TrueNAT-PCR hmangin Champhaiah mipa kum 35 mi, tun hnaia Tripura aṭanga lut, quarantine facility-a awm lai hmuh chhuah a ni a; Saitualah mipa kum 25-a upa, Silchar aṭanga lo lut, quarantine facility-a awm mek hmuh a ni bawk.
RAT hmangin Aizawlah hmeichhia pahnih, kum 16 leh 29-a upa hmuh chhuah a ni a; Serchhipah hmeichhia kum 35 mi, Assam Rifles sipai nupui leh, Lawngtlaiah mipa leh hmeichhia, kum 18 mi ve ve hmuh chhuah niin, Lawngtlaia mite hi hripui an kaina hriat a ni lo.
October 17-a hmuh chhuah:
October 17, Inrinniah Covid-19 vei mi pariat hmuh chhuah a ni. ZMC laboratory-ah mipa leh hmeichhia pahnih ve ve hmuh chhuah a ni a; mipate chu kum 16 leh 17-a upa, Bilkhawthlir leh Lunglei khaw mi, pawl 10 leh 12 zirlai tan sikul ṭan a nih leh tawh avanga an sikul kalna St. Joseph's HSS, Aizawla an luh hmaa endik an ni. Hmeichhiate chu Mission Venga mi kum 35 mi leh Sumsuih khuaa cheng kum 34-a upa an ni.
TrueNAT-PCR hmangin Lunglei Civil Hospital-ah mipa pahnih kum 32 leh 38 mi hmuh chhuah a ni a; Assam Rifles sipai ve ve niin, Covid-19 symptom an nei lo.
RAT hmangin Aizawlah hmeichhia kum 25 mi leh mipa kum 38 mi hmuh chhuah a ni. Mipa hi Kolkata aṭanga rawn haw, Lengpui Airport-a lo endik niin, symptom a nei lo. Hmeichhia hi missionary, Assam aṭanga rawn haw, symptom nei a ni.