Khehpuam mûm 6,22,65,422 man tawh Khempuam vanga convict an la awm lo

Excise & Narcotics department chuan pseudoephedrine (khehpuam) mûm 6,22,65,422 an man tawh. Excise & Narcotics department hotute chuan pseudoephedrine ruala mihring an man zingah Court-a thiam loh chang an la awm loh thu Vanglaini palai zawhna chhangin an sawi.

Excise & Narcotics depart­ment-in an chhinchhiah danin, Mizorama pseudoephedrine an man hmasak ber chu June, 2011-ah a ni a, hemi ṭum hian mûm 5,00,000 an man.
Pseu­doephedrine an man hma hian January 2011-ah Ephedrine an lo man tawh a; Ephedrine kg. 44.30 an man neitu chu Court-in thiam loh a chantir a, pawisa chawitir a nih bakah jail tàntir a ni.
Khehpuam kaihhnawiaha thubuai ziah luh hi kum 2012-ah pathum, kum 2013-ah pasarih leh kum 2014-ah pali a awm a; mahse khehpuam kaihhnawiha thubuai buai ziah luh tawh 11 aṭangin Court-in thiam loh chantir (convict) an la awm lo.
Thubuai pakua chu Court-ah ngaihtuah lia mek a ni a, thubuai pahnih chu Court-in chingfel tawhin, thubuai kaihhnawiha mante chu chhuah zalen an ni.
Pseudoepherine hi Aizawl, Kolasib leh Champhaia Excise & narcotics department hna­thawkte chauhin an man a; Aizawla mite'n man tam berin, mûm 2,51,75,417 an man.
Vanglaini palai zawhna chhangin Excise & Narcotics department hotute chuan, tunlai hian Mizoramah khehpuam man tur a awm meuh tawh loh thu an sawi a, "A chhan tak kan hre bik lo. Demand a awm lo ni berin kan hria a, a siamtute pawhin an siam meuh tawh loin kan hria," an ti.