Khawthlir
Chhanchhuah dan inzirtir
Nimin khan India ram hmun dang rualin Mizoram district khawpui hrang hrangah kângmei chhuahnaa chhanchhuah hna thawh dan inzirtirna, National Level Fire & Evacuation Drill in Schools neih a ni a, Aizawlah chuan KM High School-ah neih a ni.
Crime review
Hnahthial police-te chuan nimin khan Hnahthial SDPO Bruce Vabeihrokhai hoin SDPO office-ah Crime Review Meeting an nei a, Hnahthial PS, Thingsai PS leh leh S. Vanlaiphai PS officer in-charge-te an tel.
Mi 22,178-in la
January 20, 2015 thleng khan Mizoram Liquor (Prohibition and Control) Act, 2014 hnuaia zu lei phalna dilna form chu mi 22,178-in an la tawh. Zu lei dilna form hi Rs. 20 man a ni a, a licence lak chhuahna tur zat erawh bituk a la ni lo.
Ram humhalh
School Education Department Land and Building Protection Committee chuan thuchhuah siamin, Chhiahtlang M/S ram chu School Education department hotute be râwn loin Revenue department-in vantlang tan hlehthlak a tum niin an tarlang a, hei hi an rem tih loh thu an puang. He thil hi sût turin an ngen a, an ngennain awmzia a neih loh chuan February 2 aṭangin tiam chin awm loin School Education department hnuaia zirna in zawng zawng khâr an tum thu an puang.
Aiawh tír
New Delhi-a Republic Day hmanna turah Ministry of Tribal Welfare-in a lo sawm angin, Mizoram sorkar chuan tribal representative pahnih a tír.
Ramhlun S -in hriattir
Ramhlun South thlanmuala mahni chhungte phum chuan, February 2015 hmain chhinchhiahna siam vek tur a ni. Hemi hnua chhinchhiahna awm lo chu hmun ruak anga ngaih tur a ni ang. Hlamzuih phumna chu chhinchhiah loh tur a ni.