CM-in Mizoram Paite Tribe Council a hawng

Chief minister Lal Thanhawla chuan Thawhlehni khan Mimbungah Sialkal Range Development Council (SRDC) a hawng a; Mimbungah vek hian Mizoram Paite Tribe Council (MTPC)-in CM hi an chawimawi nghal.

CM Lal Thanhawla chuan, Zohnah­thlakte chu ṭawng hman inang lo mah se, chhûl khat chhuak vek kan nih thu a sawi a, "Kan ṭawngte hi danglamna deuh awm mah se, inlaichìnna hnai tak nei vek a ni. Khawsak ziaráng inang tlang kan nihnate hian chhûl khat chhuak kan nihzia a tilang. Hnam dangte'n min zah nan leh min hlauh nan pawh inngeih taka kan khawsak tlan a ṭul a ni," a ti.

Zohnahthlakte chu inla hrang tham kan nih loh thu sawiin, Chief Minister chuan, "Kan unau thisen zawmpui hel ṭhenkhatte'n an unau dangte hnenah tukluih chhiah khawn a, tharuma sawisaa an dawr an khârtirte hi a pawi hle a ni," a ti a; rualkhai taka hmasawnna neih chu sorkar duh dan a nih thu a sawi.

Lal Thanhawla chuan Zohnahthlakte chu ram hrang hrang - India, Myanmar leh Bangladesh-ahte an awm thu sawiin, "India-ah pawh state hrang hrang - Mizoram, Manipur, Tripura leh Assam-ahte kan awm a, kan awmna ṭheuhah khua leh tui ṭha, mi rinawm leh dik nih kan tum vek tur a ni," a ti.

Bialtu MLA H Rohluna chuan, Lal Thanhawla'n chawimawi a phu thu sawiin, "Sialkal tlangdunga chengte hrechiangtu a nih angin, mumal zawka hmasawnna kan neih theihna tura SRDC pawh hi min pek a ni," a ti a; SRDC a nih hma hian board angin kum eng emaw zat a kal tawh thu a sawi.

Lal Thanhawla chawimawina hun hi SRDC Executive Committee chairman Damsavung-in a kaihruai a, MPTC president H Dal Khen Khai chuan Lal Thanhawla an chawimawi chhan chu - an tlangdunga chengte hmangaihtu leh an hmasawnna duha SRDC petu a nih vang a nih thu a sawi.