Sum hmang uluk zual turin chah

Horticulture minister PC Lalthanliana chuan, sorkar laipui aṭanga sum hmuhte state budget-ah dah luh a nih tâk avangin sum hman kawngah uluk lehzuala kal a ṭul thu a sawi.

Horticulture officer-te’n nimina an directorate conference hall-a mee­ting an neihnaah thu sawi­in, Horticulture Mi­nister chuan, "Sum harsatna avangin duh hun hunah sum lakchhuah mai theih a nih lo," a ti a; fimkhur leh renchem taka a daihzâi zawnga sum hmang turin officer-te a chah a ni.

PC Lalthanliana chuan, kumin kum kal mekah hmalakna hrang hrang an kalpui mek leh bul an ṭan thar turte uluk taka bawhzui a duh thu a sawi a, division tinte chu an hnathawh a taka hmuh a duh thu a hrilh.

Parliamentary secre­tary (Horticulture) K Lalrinthanga chuan, lo­nei­tute hmasawnna turin Horticulture mithiamte finchhuah leh kaihhruai an ma­mawh thu a sawi a, "Ram leilung awm dan, sik leh sa leh ruahtui tlak dan milin thlai leh thei ṭhatna hmunte a awm ṭhin a, lineitute'n an dinchhuahpui ngei theihna tur thlai leh thei an chîn thiam theih nan kawng kawhhmuh an ngai a ni," a ti.

Meeting hi Horticul­ture director R Zotawna'n a kaihruai a, an depart­ment hmalak zelna turte an sawiho a ni.