Hmarchhak HIV/AIDS do dan thar sawiho

Nimin khan Hotel Regency conference hall-ah hmarchhak state pariatte puala HIV/AIDS dona chungchanga inrâwnkhawmna, 'Consultative Meeting on North East Specific Strategy on HIV’ ṭan a ni a, a hawnna inkhawm chu Health minister Lal Thanzara'n a hmanpui. Meeting hi vawiinah chhunzawm a ni ang.

Inrâwnkhawmna hi National AIDS Control Organization (NACO), sorkar laipuia Ministry of Health & Family Welfare hnuaia Centre for Disease Con­trol (CDC) leh Mizoram State AIDS Control Society-te ṭangkawp buatsaih a ni a; NACO hotute, CDC aiawh, hmarchhak state hrang hranga State AIDS Control Society (SACS) aiawh te, Mizoram sorkara Health department hotute leh MSACS-a thawkte an tel.

Health minister Lal Thanzara chuan, NACO leh CDC-te'n HIV/AIDS chungchanga hmarchhak bika kalphung thar duan dan tur sawihona Mizorama an nghat chu lawmawm a tih thu a sawi a, "He inrawnkhawmna hian HIV/AIDS donaah Health Ministry-in hmarchhak bial a ngaihven hle an ni tih a tichiang a ni," a ti.

Lal Thanzara chuan, hmarchhak biala HIV/AIDS dona chu chak zawka kalpui a, AIDS/HIV vei pawh an tlakhniam phah a beisei thu a sawi.

NACO deputy director gene­ral Dr Neeraj Dhingra chuan, kalphung thar hnuaiah hian Centre for Disease Control (CDC) nen ṭang­kawpin hmarchhaka AIDS/HIV darhzau zel venna atan a bika project thar buatsaih tum a nih thu a sawi a, "Hei hi NACO-in hmarchhak state-te a thawhpuina budget piah lam, an normal bud­get khawih danglam loa AIDS/HIV donaa a belhchhahna tur thil thar a ni," a ti a; project tharah chuan state thawk ṭha lo leh ti ṭha lo chu inhnuhdawhtir theih a ni dawn tih a sawi.

Dr Neeraj Dhingra sawi danin, India ram pumah hmarchhak bial, a bikin Manipur, Mizoram leh Nagaland-te chu state population aṭanga chhûtin HIV vei tamna ber state an ni a; Mizoram leh Nagaland-ah HIV hrik pâi an pung zel a, kum 2000 bâwr chho vela HIV+ve tamna Manipur erawh chu an tlahniam tial tial thung.

Dr Neeraj Dhingra chuan, hmarchhak bial chu damdawi hmansual leh ruihhlo avangin HIV+ve an tam phah a, Myanmar aṭanga ruihhlo tawlhrûkna kawng a nih bawk avangin HIV+ve an pung chak niin a sawi a; hengte avang hian sorkar laipui chuan HIV/AIDS donaaah a bika kalphung siam a remti nia sawiin, "Kum nga chhungin hmarchhakah danglamna a thlen ngei ang," a ti.

Meeting hawnnaah hian MSACS project director Dr Lalmalsawmi Sailo-in inlawmna thu a sawi a, Mizoram sorkara Health secretary Arun Goyal leh CDC aiawh Dr Sampath-te pawhin thu an sawi.