MNF-in vawiinah kawngzawh dawn
MNF party chuan vawiin hian Aizawl leh Mizoram district khawpui tin bakah, khaw dang ṭhenkhatah 'Mipui thlavâng hauhna kawngzawh' an huaihawt dawn a, Mizo mipuite tel vek turin an sáwm.
'Mipui thlavâng hauhna kawngzawh' huaihawt tur chungchangah hian MNF vice president Dr R Lalthangliana chuan nimin Aizawl Press Club-ah press conference a nei a; kawngzawh chu MNF party huaihawt ni mah se, MNF chauh telna tur bik a ni lo tih sawiin, "Mizo mipuite tan a ni a, party rilru dah bo a, rawn tel vek turin mi tinte kan sáwm a ni," a ti.
Dr R Lalthangliana chuan, buhfai man tihsan chu sorkar laipui tih ni loin, Mizoram sorkarin Cabinet thutlukna anga an tihsan a nih thu a sawi a, Central-in APL, BPL leh AAY buhfai subsidy a pek chu a la tidanglam lo tih a sawi.
Leiman tihpun chungchangah, kum 2006-a MNF sorkarin The Mizoram (Taxes on Land, Buildings and Assessment) Act, 2004 tlawhchhana a tihsan avangin khatih laia Congress ṭhalai hoin an president Zodintluanga hoin Revenue director office an luhkhung a, office bungrua an suasam niin a sawi bawk.
Dr R Lalthangliana sawi danin, kawngzawh hi Aizawl leh district headquarters tin - Lunglei, Saiha, Lawngtlai, Serchhip, Champhai, Kolasib leh Mamit khawpuiahte bakah, Hnahthial, Tlabung, Chawngte, Lungsen, Khawzawl, Saitual-ahte neih a ni ang.
An kawngzawh vanga harsatna eng emaw an tawk an awm a nih pawhin, an hriatthiamna an ngen tih a sawi a, "Sorkarin mipui, rethei zawkte tawrhna a thlen dodalna a ni a, ti lo thei lo kan nih avangin kawng kan zawh dawn a ni," a ti.