MJA member-te'n Hnahthial tui lakna an tlawh

MJA Hnahthial Sub-Division member-te chuan nimin khan Greater Hnahthial Water Supply Scheme (GHWSS) siam zawh tawh, enchhinna atana an hman mek chu tui lakna hmun, Tuichâng luia pumping site an tlawh.

Hnahthial MJA member-te hi PHE executive engineer C Lalhmahruaia leh SDO Malcolm Lalhmingliana leh thawktu dangte'n an lo dawngsawng a; tui lakna hmunte an fan kualpui bakah, hna an thawh dante an hrilhfiah a ni.

GHWSS atan hian Rs. 8,25,00,000 ruahman niin, kum 2012-ah hna thawh ṭan a ni a, civil work ṭhen­khat chu deprtment leh contractor-ten an thawk a, pump site chu Johnson Diesel Sales & Service (JDSS)-in an siam thung. January 19, 2015 khan enchhina (trial run) neih a ni a, trial run hi darkar 72 chhung neih tur a ni.

PHE hotute sawi dan­in, GHWSS-ah hian Tui­chang lui aṭangin ITC Tlanga tuikhuah lian (main reservior)-ah darkar khatah litre 60,000 a pump thei a; main reservoir aṭangin Hnahthial khawpui chhunga hmun palia reservoir, litre 12,00,000 chuang a dawng theiah a lut leh a ni.