MPCC-in tum mumal nei lohah MNF an puh

Congress party chuan thuchhuah siamin, MNF-te'n sorkar sum harsatzia an sawi reng chunga sorkarin sum harsatna sukiang tura hma a laknate duh loh lantirna atana MNF-in kawngzawh an buatsaih tur chu MNF-in tum mumal an neih lohzia tilangtu a nih thu an tarlang.

MPCC chuan, Mizoram mipui hriatah Congress sorkarin sum renchemna tur leh sum hâi luh tam zawk theihna turin Economic Measures and Resources Mobilization a buatsaih mek niin a tarlang a, "Hetah hian department zawng zawngin an zawm tur thil 14 zet tarlan a ni a, department 34 tan bik an tih tur tam tak duan a ni bawk," an ti.

MPCC chuan, "Rethei zualte khawih si loin ration buhfai man kg. khat Rs. 5.50 leka tihpun a ni a, tunlai chhanah Rs. 5.50 hian eng thil tak tak mah a lei thei tawh lo tih hre reng chunga 'Buhfai man a to,' tia opposition-te an au hi mipui tana thawktu sorkar an sawichhia ni loin, mipui a dik lo zawngin an fuihpawrh zawk a ni," an ti.

Congress party chuan, sorkar sum harsatna chhan chu MNF sorkar­in IR battalion pahnih an din vang leh sikul 337 an provincialize vang niin an tarlang bawk.