Saiha leh Lawngtlai dist-a hnathawh MP hoin thlir

Thawhlehni leh Nilaini khan Saiha leh Lawngtlaiah District Vigilance and Monitoring Committee chu chairman CL Ruala, Lok Sabha MP leh co-chairman Ronald Sapa Tlau, Rajya Sabha MP hoin an ṭhukhawm.

Lawngtlai District Vigilance and Monitoring Committee chu nimin khan DC conference hall-ah an ṭhukhawm a; CL Ruala chuan, officer kalkhawmte chu Lawngtlai district-in hma a sawn theihna atana thawktu an nih hre reng a, an hnathawhah a ṭha ber thlen tum turin a chah a, "Chutiang mi chu kan ram hian a mamawh a ni," a ti.

Ronald Sapa Tlau pawhin thu sawiin, sorkar department-te hmasawnna hna thawh chu mipuite'n venpuiin ngaihven se a duh thu a sawi. Meeting-ah hian Lawng­tlai district-a MLA pathum - C Ngunlianchung­a, H Zothangliana leh Dr BD Chakma te an tel.

Saiha District Vigilance and Monitoring Committee chu Thawhlehni khan DC conference hall-ah an ṭhukhawm a, Saiha district-a MLA Hiphei leh MADC CEM RT Zachono te pawh an tel.

District pahniha District Vigilance and Monitoring Committee meeting-ah hian sorkar laipui programme hrang hranga hna thawhte leh hmachhawpte an sawiho a ni.