Ramri-ah police dah belh dawn; Assam chet dan MHA-ah kan thlen : Home Minister

Ramria buaina thleng chungchangah Home minister Lalchamliana chuan nimin khan thuthar thehdarhtute a kâwm a; ramri-ah police dah belh a nih dawn thu leh, Mizoram sorkarin Assam sorkar chu boruak muanawm siam vat turin a beisei thu a puang a; Assam chet dan Ministry of Home Affairs-ah an thlen  thu a sawi bawk.

Mizoram leh Assam inkara buaina thleng chungchang ngaihtuahin Council of Minis-ters chu nimin chawhma khan CMO conference hall-ah an ṭhukhawm a; an rorelte chu Home Minister-in a puang chhuak a ni.

Lalchamliana chuan, "Tunah hian ramri hrúla buainain a nante thlamuan tur leh thil awm dan hre chiang turin kan CM remtihnain minister-te an chhuak nghal dawn," a ti a; minister of state K Lalrinliana leh MLA eng emaw zatin Vairengte an thlen tawh thu a sawi.

Home Minister chuan, Mizoram luhna kawngpui ber Assam ram chhungah dan a nih avangin mipui ni tin mamawhte a lo lut thei rih lo tih sawiin, "Mipui ni tin mamawhte hi ṭhenawm state dangte aṭangin, a bik takin cooking gas leh tuialhtheite la lut tura hmalak mek a ni," a ti a; ramria buaina chu ram leh hnam thil a nih avangin, thil a harsa deuh a nih pawhin tuar hrâm hrâm turin sorkarin mipui a ngen tih a sawi a ni.

Home minister Lal­chamliana chuan, ramria buaina vangin Assam lam aṭanga bungrua lak luh a nih rih loh avanga mamawh bak chheprelh lo tur te, thil man tisang lo turte leh 'Sem sem dam dam' tih rilru pûa Mizoram hun tawn mek hmachhawn turin mi tin a ngen.

Minister ṭawiawmtu chief secretary Lalnun­mawia Chuaungo chuan, mipui ni tin mamawh - ei leh barte leh tuialhthei leh eirawngbawlna gas-te chu Inrinni aṭang khan Supply department Secretary leh Director-te'n an buaipui nghal thu a sawi.

Chief Secretary chuan, Inrinni khan FCSCA department hotute'n Aizawla oil company hotute koin, tuialhthei leh gas-ah harsatna thleng thei phuhrûk dan an sawiho tih a sawi a, "Tripura lam aṭanga tih dan turte, Manipur aṭanga lak dan turte an ngaihtuah a, chu chu thil awlai tak a ni dawn lo... Chutih rual chuan, sorkar chuan mipuite'n harsatna lutuk an tawh lohna turin theihtawp chhuahin hma a la mek a ni," a ti.