Bihar inthlana duty tur IR police kaltir dawn lo
Mizo IR battalion zinga eng emaw zat chu Bihar Assembly inthlanpuia venhimna hna thawk tura tih an nih angin, kal tura thutlukna siam a ni a; mahse, Mizoram-Assam ramri buai vangin thutlukna sût a ni.
IR battalion-te Bihar-a kaltir tur chungchangah hian Central YMA hruaitute chuan nimin tlai khan chief minister Zoramthanga an hmu a, IR police-te chu Bihar inthlanah an duty lohna atan hma la turin an ngen a ni.
Mizo IR sipaite Bihar-a an kal leh kal loh tur chungchangah hian Home minister Lalchamliana chuan, "Bihar election duty tur IR company 10 tir tura Mizoram sorkar a rawn tih chu company pariat tirh turin ruahman a ni a, mahse, Cabinet chuan Assam lamin road block an neih avangin kal tir chi-ah kan ngai rih lo," a ti.
Mizoram sorkarin IR police-te Bihar-a kaltir lo tura thutlukna a siam tâk avang hian CYMA hruaitute chuan, YMA sub-headquarters, group leh branch-te hnena IR police, Bihar pana an kal tur dang tura an lo hriattir tawh pawh bawhzui a ngai lo tura an ngaih thu an sawi.