MNF-in kawng an zawh Kan sorkar hunah thisen sawngbawlna man lak kan titawp nghal ang: Tawnluia

MNF party chuan nimin khan district khawpui tin leh khaw lian dang ṭhenkhatah 'Mipui thlavang hauhna kawng zawh' an huaihawt a; Mizoram Governor Dr Aziz Qureshi hnenah memorandum an thehlut nghal. MNF vice president Tawnluia chuan, thisen sawngbawlna man unit khata Rs. 550 zel lak chu an sorkar hunah an tihtawp nghal tur thu a sawi.

MNF kawngzawh hi Aizawlah chuan chawhma dar 11-ah Chanmari kâwnah ṭan a ni a, a ṭannaah hian MNF vice president R Tlanghmingthanga'n thu a sawi. Zarkawt kâwnah châwlin, MNF PAC member Lalthlengliana'n thu a sawi a, Israel Point-ah MNF general secretary Lalruatkima, MLA-in thu a sawi. Chhun dar 1 velah an tâwpna hmun tur, Vanapa Hall kawt an thleng a, MNF senior vice president Tawnluia thu a sawi a ni.

Thu sawitute hian an kawng zawh chhan hrang hrangte an sawi. MNF sr.vice president Tawnluia chuan, buhfai man tihsan tawh chu a ngai anga tihhniam leh an phût a, leiman leh chhiah dangte leh electric leh tui bill-te pawh tihhniam leh an phût tih sawiin, an thil phûtte chu Larsap hnenah an thehlut dawn tih a sawi a, "Memorandum hi an tihpuitlin leh puitlin loh kan en zui zel dawn a, mipui thlavang hauhin kan kal zel dawn," a ti.

Tawnluia chuan, sorkaruin thisen sawngbawl man an la chu an duh loh thu sawiin, "Kan sorkar hunah chuan thisen sawngbawl man kan titawp nghal dawn a, kan la ve lo ang," a ti. Congress kaihhruai sorkar chu buhfai man tihsan aṭangin NLUP sem tur tuakah a puh a, chu chu Supply minister John Rotluangliana thu sawiin a tichiang niin a sawi.

MNF memorandum hi senior vice president Tawnluia hoin hruaitute'n kawng zawh programme an zawhah an thehlut a, mahse Larsap a awm loh avangin a secretary hnenah an pe a ni.

MNF mipui thlavâng hauhna kawngzawh hi district headquarters tin - Lunglei, Saiha, Lawngtlai, Serchhip, Champhai, Kolasib leh Mamit khawpuiahte bakah, Hnahthial, Tlabung, Chawngte, Lungsen, Khawzawl, Saitual-ahte pawh neih a ni.