Khawthlir

Terminal-ah luh phal loh
January 26-a Republic Day lo thleng tur avangin India ram puma airport zawng zawngah Bureau of Civil Aviation Security thuchhuak angin venhimna khauh lehzuala kalpui a ni a; hei vang hian Lengpui Airport-ah pawh terminal building chhungah passenger leh thawktute tih loh chu loh phal a ni lo a, visitor entry ticket hmanga luh theih a ni rih lo. Visitor luh phal loh hi January 20-31, 2015 chhung kalpui tur a ni.

Tawngtai rual
Republic Veng mipuite chu nimin khan an veng khelmualah tun hnaia an vengah Thlarau Thianghlim thlamuanna leh boruak ṭha a thlen theih nan ṭawngṭai rual beihpui an thlak. Ṭawngṭaihona an buatsaih chhan hi January 9, 2015 zana an venga tualthahna rapthlak tak a thlen hnua Republic Veng mipui, a bikin nunaute tun thlenga an la thlabar vang a ni a; an veng leh Mizoram tan an ṭawng-
ṭai bakah, Pathian fakin an zaiho a ni.

Khelmual hlân
Presbyterian kohhrana hmeichhe pawl inkhawmpui, Mizoram Kohhran Hmeichhe Khawmpui Lian vawi 46-na chu March 6-8, 2015 chhungin Mamit GSA khelmualah neih a ni dawn a; pandal sakna tur GSA khelmual chu nizan khan Pathian hnena hlanna an nei a, Mamit khawpuia kohhran hmeichhiate an ṭawngṭai rual a ni.

Ramri dinhmun
January 19, 2015 zinga Assam Police leh Forest mite'n Mizo leilet neitu leh enkawltute an vauna hmun, Buhchangphai Ramthar Zau chu nimin khan MNF vice president Dr R Lalthangliana'n a tlawh a, thil awm dan a enfiah. Vanglaini palai zawhna chhangin, Vairengte SDPO Remlalliana Hnamte chuan, Ramthar Zauah hian Assam sorkar mite chuan thâwm an nei zui rih lo tih a sawi a; tunah hian police pasarihin Ramthar Zau chu an awmchilh mek thu leh, Kolasib SP leh Hailakandi SP-te an inbiak tawh thu a sawi bawk.