Ram lâk dan thar tur sawiho

The Right to Fair Compensation and Transparency in Land Ac­quisition, Rehabilitation and Resettlement Act 2013 zir chiang tura Mizoram sorkarin a din, Drafting Committee chu nimin khan an chairman, R Romawia, Land Revenue & Settlement minister hoin Land Revenue & Settlement directorate conference hall-ah an ṭhukhawm.

The Right to Fair Compensation and Transparency in Land Acquisition, Rehabilitation and Resettlement Act 2013 hi sorkar laipuiin mimal ram a lak dan, zangnadawmna a pek dan leh ram neitute a chawmdawlna atana dan thar a siam a ni a, mahse Mizoram dinhmun ngaihtuahin hman remchang lo deuha hriat a nih avangin, a zir chiang tur leh a ṭul anga dan thar duang turin Drafting Committee din a ni.

Minister R Romawia chuan, Drafting Committee din a ṭul chhan sawiin, "He dan thar hian dan kan hman mek ‘The Land Acquistion Act, 1984’ a nuai bo niin ka hria. Chutih rualin, ram danpuia Article 371(G) chuan a bik taka ram chungchanga thuneihna chu Mizoram state a pe a, chuvangin uluk takin kaklphung hi kan zirchian a, Mizoram dinhmun ngaihtuahin a ṭha ber kan duan a pawimawh a ni," a ti.

Meeting chuan, 'Land acqui­sition leh requisition-ah Central leh state sorkarte thuneihna inṭáwm a nih avangin ram danpui hnuaia Article 371 (G)-a Mizoram dinhmun leh ram danpui hnuaia Article 371 (A)-a Nagaland dinhmunte uluk zawk a zir chian ni se,' a ti a; Nagaland sorkarin a kalpui dan zirchian a nih hnuah Mizoram sorkarin hma a lak zel dan tur la ngaihtuah turin thu an dah a ni.