Ministry-te'n Mizoram hnathawk chak lo an ti - CM

Chief minister Lal Thanhawla chuan nimin khan chief secretary conference room-ah Mizoram sorkara secretary-te meeting a neihpui. CM chuan, sorkar laipui dàwr tura a kal chángin ministry hrang hrangin Mizoram chu hna thawk chak lo an ti ṭhin tih a sawi a, "A zahthlak duh hle a ni," a ti.

Chief minister chuan, "Policy te, kal dan tur ruangám leh kalphungte kan duan hian, kan ngaih­tuahnate hlâwk zawk tura kan inher rem ve a ṭul thin a ni," a ti a; sorkarin secretary-te chungah beiseina sang tak a neih thu a sawi.

Lal Thanhawla chuan, sum inremchemna ni pahfawmin, Delhi kal a ṭulnaah mahni kal kher lo a, Mizoram House-a Mizoram sorkar officer awmte hmang ṭangkai turin secretary-te chu a chah a, "OSD khu thil tih ngai zawng zawng hriattir hmasaka hman ṭangkai thiam a ṭul. Hei hian he lama thawh tur ṭulte tluang tak leh felfai takin a thawh hman theih phah dawn a ni," a ti.

CM Lal Thanhawla chuan, kumina an thawh tur zinga pawimawh hmasa chu - project leh scheme hrang hrang thawh mekte vil ngun leh endik a nih thu a sawi a; NLUP chu thingtlang mi harsate leh khawpuia miretheite châwikânna tur a ni tih hre reng chunga, kalpui a nih danah NITI Aayog-in thil hriat duh an rawn dilte chu kimchang taka hrilhhre thuai turin a chah.